انسٹاگرام میں فل اسکرین تصاویر کی آزمائش شروع کرنے کا اعلان

انسٹاگرام کی جانب سے ایپ کو ٹک ٹاک میں بدل دینے والے متنازع ری ڈیزائن پر کام روک دیا گیا ہے مگر اس کا مطلب یہ نہیں کہ کمپنی نے اپنا ارادہ بدل دیا ہے۔

انسٹاگرام کے سی ای او ایڈم موسری نے بتایا ہے کہ ایک یا 2 ہفتوں میں فوٹو شیئرنگ ایپ میں فل اسکرین 9:16 ریشو کی تصاویر کا فیچر متعارف کرا دیا جائے گا۔

انہوں نے کہا کہ آپ انسٹاگرام پر فل اسکرین ویڈیو تو دیکھ سکتے ہیں مگر تصاویر کا سائز اتنا نہیں ہوتا، تو ہم نے سوچا کہ دونوں کے ساتھ یکساں سلوک کیا جانا چاہیے۔

اس وقت انسٹاگرام میں صرف ایسی تصاویر پوسٹ کی جاسکتی ہیں جن کا ریشو 4:5 ہوتا ہے۔

یہ اعلان اس وقت کیا گیا جب جولائی کے آخر میں ایڈم موسری نے صارفین کی تنقید کے بعد انسٹاگرام کو ٹک ٹاک میں تبدیل کرنے والی چند تبدیلیوں کو ریورس کردیا تھا۔

اس وقت کمپنی کا کہنا تھا کہ ٹک ٹاک کی طرح فل اسکرین ہوم فیڈ کی آزمائش ختم کی جارہی ہے۔

اب ایسا ہوم فیڈ تو صارفین کے لیے متعارف نہیں کرایا جائے گا مگر تصاویر کے لیے ضرور ایسا کیا جارہا ہے۔

ایڈم موسری نے ایک انٹرویو میں تسلیم کیا تھا کہ نئے ہوم فیڈ ڈیزائن پر لوگوں نے شکایات کی ہیں اور ایپ کے استعمال کی شرح میں کمی آئی ہے۔

انہوں نے یہ بھی تسلیم کیا تھا کہ فل اسکرین کا تجربہ تصاویر کے لیے زیادہ مثالی نہیں، مگر بظاہر وہ اس سے پیچھے ہٹنے کے لیے تیار نہیں۔