16 اگست ، 2022 
ممنوعہ فنڈنگ کیس کے خلاف پی ٹی آئی کی درخواست لارجر بینچ کے سپرد
16 اگست ، 2022
اسلام آباد ہائیکورٹ نے الیکشن کمیشن کے ممنوعہ فنڈنگ کیس کے فیصلے کے خلاف پی ٹی آئی کی درخواست سماعت کے لیے لارجر بینچ کے سپرد کردی۔
اسلام آباد ہائیکورٹ کے قائم مقام چیف جسٹس عامر فاروق نے الیکشن کمیشن کے ممنوعہ فنڈنگ کیس کے فیصلے کے خلاف پی ٹی آئی کی درخواست پر سماعت کی جس سلسلے میں پی ٹی آئی کی جانب سے بیرسٹر انور منصور اور فیصل چوہدری پیش ہوئے۔
جسٹس عامر فاروق نے کہا کہ اس درخواست پر سماعت کے لیے لارجر بینچ بنا دیتے ہیں، لارجر بینچ کیس کی پرسوں سماعت کرے گا۔
پی ٹی آئی کے وکیل انور منصور نے دلائل میں کہا کہ الیکشن کمیشن کی فیکٹ فائنڈنگ رپورٹ ہم نے چیلنج کی ہے، حنیف عباسی کیس میں سپریم کورٹ نے واضح کیا ہے۔
انور منصور نے کہا کہ اکاؤنٹس مختلف وجوہات کی بنا پر ظاہر کرنا ضروری نہیں تھا، پیسہ یہاں سے گیا ہے اس لیے صوبوں کے اکاؤنٹس میں ظاہر کرنا ضروری نہیں تھا۔
انور منصور نے استدعا کی کہ شوکاز نوٹس کی حد تک کوئی ایکشن نہ لیا جائے، اس پر عدالت نے کہا کہ یہ معاملہ بھی لارجر بینچ ہی دیکھے گا۔
عدالت نے کیس لارجر بینچ کے سامنے مقرر کرنے کی ہدایت کرتے ہوئے سماعت 18 اگست تک ملتوی کردی۔
