17 اگست ، 2022 
عام انتخابات میں نواز شریف پارٹی کی انتخابی مہم کی قیادت کریں گے، رانا ثنا اللہ
17 اگست ، 2022
وفاقی وزیر داخلہ رانا ثنااللہ کا کہنا ہے کہ عام انتخابات میں سابق وزیراعظم نواز شریف مسلم لیگ ن کی انتخابی مہم کی قیادت کریں گے ۔
رانا ثنااللّٰہ نے جدہ میں مقیم اوور سیز پاکستانیوں کی استقبالیہ تقریب سے خطاب کرتے ہوئے کہا کہ مشکل وقت گزر چکا، پاکستان اب معاشی اور سیاسی استحکام کی طرف گامزن ہے۔
انہوں نے کہا کہ ملک عمرانی فتنے، فساد اور سیاسی انتشار کا متحمل نہیں ہوسکتا ، حکومت آئینی مدت پوری کرے گی، انتخابات وقتِ مقررہ پر ہوں گے اور سابق وزیراعظم نواز شریف مسلم لیگ ن کی انتخابی مہم کی قیادت کریں گے۔
استقبالیہ تقریب میں بڑی تعداد میں سعودی عرب میں مقیم پاکستانیوں نے شرکت کی، وزیر داخلہ نے اپنے خطاب میں تقریب کے شرکاء کو ملک کو درپیش سیاسی اور معاشی چیلنجز سے آگاہ کیا۔
واضح رہے کہ گزشتہ دنوں رانا ثنا اللہ اہل خانہ کے ساتھ عمرے کی ادائیگی کے لیے سعودی عرب روانہ ہوئے تھے۔
