24 اگست ، 2022 
نواز الدین صدیقی کے نئے لُک نے دیکھنے والوں کے سر چکرا دیے
24 اگست ، 2022
بالی وڈ کے ورسٹائل اداکاروں میں سے ایک نواز الدین صدیقی نے اپنی نئی فلم کے لیے خاتون کا روپ اپنا کر دیکھنے والوں ششدر کر دیا ہے۔
اپنی اداکارانہ صلاحیتوں سے دنیا کو قائل کرنے والے نواز الدین اپنے مداحوں کو انٹرٹین کرنے کا کوئی موقع ہاتھ سے نہیں جانے دیتے، اور اب بھی کچھ ایسا ہی ہوا ہے۔
منگل کو معروف بھارتی فلم اسٹوڈیو'زی اسٹوڈیو' نے نواز الدین صدیقی کی فلم کا موشن پوسٹر جاری کیا جو ہر ایک کی توجہ اپنی جانب مبذول کروا رہا ہے۔
اس پوسٹر کو دیکھنے والے پہلی نظر میں شاید ہی پہچان سکیں کہ ٹائٹل پر کوئی خاتون نہیں بلکہ نواز الدین صدیقی خود ہیں۔
اداکار کا اس حوالے سے کہنا ہے کہ ویسے تو انہوں نے اپنے کیریئر کے دوران متعدد کردار ادا کیے ہیں لیکن ہڈی میں ایک منفرد انداز اپنایا ہے جو اس سے پہلے کبھی نہیں کیا، اس سے بطور اداکار مجھے مزید تجربہ حاصل ہو گا۔
فلم ’ہڈی‘ ایک انتقامی ڈرامے پر مبنی کرائم اسٹوری ہے جسے آئندہ برس ریلیز کیا جائے گا۔
