26 اگست ، 2022 
فیفا نے بھارت کی معطلی 9 دن بعد ہی ختم کر دی،اہم ایونٹ کی میزبانی بھی واپس مل گئی
26 اگست ، 2022
فٹبال کی عالمی تنظیم فیفا نے بھارت کی معطلی کو 9 دن بعد ہی ختم کردیا، بھارتی ٹیم ایک بار پھر انٹرنیشنل میچز کھیلنے کی اہل ہوگئی ، بھارت کو انڈر 17 ویمنز ورلڈ کپ کی میزبانی بھی واپس مل گئی۔
فٹبال کی عالمی تنظیم فیفا نے فٹبال معاملات میں بیرونی مداخلت کی بنیاد پر 17 اگست کو بھارت کی رکنیت کو معطل کردیا تھا تاہم9 دن بعد ہی فیفا نے بھارت کو بحال کردیا۔
فیفا کا کہنا ہے کہ انڈین فٹبال میں عدالتی حکم پر بننے والی ایڈمنسٹریٹر کی کمیٹی کو ختم کر کے فٹبال فیڈریشن کے حکام کو بحال کرنے کی تصدیق موصول ہوگئی ہے جس کے بعد آل انڈیا فٹبال فیڈریشن کو بحال کردیا گیا ہے۔ فیفا اور اے ایف سی انڈین فٹبال کے معاملات کو بدستور مانیٹر کرتے رہیں گے۔
فیفا نے ساتھ ساتھ بھارت کے انڈر 17 ویمنز ورلڈ کپ کی میزبانی کے حقوق بھی بحال کرنے کا اعلان کیا ۔ انڈر 17 ویمنز ورلڈ کپ 11 اکتوبر سے بھارت میں ہوگا۔
دوسری جانب بھارت کی خواتین فٹبال ٹیم پروگرام کے مطابق ساف کپ میں بھی حصہ لے گی۔
