18 ستمبر ، 2022 
کراچی پولیس بے خوف اسٹریٹ کرمنلز کو لگام ڈالنے میں ناکام
18 ستمبر ، 2022
کراچی پولیس شہر میں بے خوف اسٹریٹ کرمنلز کو لگام ڈالنے میں بری طرح ناکام ہوگئی۔
اسٹریٹ کرمنلز نے شہر کراچی میں لوٹ مار کا بازار سر گرم کیا ہوا ہے، ایک اعداد و شمار کے مطابق شہر میں صرف رواں ماہ لوٹ مار کے دوران درندوں نے 12 شہریوں کو موت کے گھاٹ اتار دیا بلکہ 15 افراد کوگولیاں مار کر زخمی بھی کردیا۔
کراچی پولیس چیف چاہے کوئی بھی منطق پیش کریں لیکن ملک کی معاشی شہ رگ میں جرائم کے دل دہلا دینے والے اعداد وشمار کچھ اور ہی کہانی بیان کر رہے ہیں۔
اعدادوشمار کے مطابق صرف جنوری سےاب تک رپورٹ ہونے والی اسٹریٹ کرائمز کی 58 ہزار وارداتوں میں 74 شہریوں سےجینےکاحق چھین لیا گیا۔
رواں سال اب تک 34 ہزار کےقریب شہری موٹرسائیکل اور 19 ہزار سے زائد شہری موبائل فونز سے محروم کردیے گئے ہیں۔
