پی ٹی آئی واپس اسمبلی میں آتی ہے تو ویلکم کریں گے: احسن اقبال

وفاقی وزیر  برائے منصوبہ بندی  احسن اقبال کا کہنا ہے کہ اگر پاکستان تحریک انصاف واپس اسمبلی میں آتی ہے تو ان کو  ویلکم کریں گے۔

جیو نیوز کے پروگرام  نیا پاکستان میں میزبان شہزاد اقبال سے گفتگو کرتے ہوئے  احسن اقبال کا  کہنا تھا کہ جاوید لطیف نے پی ٹی آئی کی سہولت کاری پر غیر ضروری بیان دیا ہے، وہ یہ بیان دینے کے مجاز نہیں تھے۔

سیکرٹری جنرل مسلم لیگ ن نے یہ بھی کہا کہ  جاوید لطیف کے بیان کا پارٹی پالیسی سے کوئی تعلق نہیں ہے۔

یاد رہے کہ مسلم لیگ ن کے سینئر رہنما جاوید لطیف نے اسلام آباد میں میڈیا سے گفتگو میں کہا تھا کہ ہم عمران خان کے سہولت کاروں کو جانتے ہیں،  ہمیں معلوم ہےکہ عمران خان راتوں کو کن کن سے ملاقاتیں کر رہے ہیں ، عمران خان دراصل چابی والا کھلونا ہیں  جو کبھی بھی اپنی مرضی سے نہیں ہلتا ۔

عمران خان نے اسمبلی میں واپسی امریکی سائفر کی تحقیقات سے مشروط کردی

اسٹیبلشمنٹ سے ہمارے اچھے تعلقات تھے، پتا نہیں کب اور کیسے خراب ہوئے، تحریک انصاف پہلی بار حکومت میں آئی تھی اس لیے غلطیاں ہوئیں: سابق وزیراعظم

واضح رہے کہ پاکستان تحریک انصاف کے چیئرمین و سابق وزیراعظم عمران خان نے اسمبلی میں واپسی امریکی سائفر کی تحقیقات سے مشروط کر دی ہے۔

صحافیوں سے گفتگو میں عمران خان کا کہنا تھاکہ امریکی سائفر کی تحقیقات کی جائیں تو اسمبلی میں واپس آسکتے ہیں، اسٹیبلشمنٹ سے ہمارے اچھے تعلقات تھے، پتا نہیں کب اور کیسے خراب ہوئے، اپوزیشن سےزیادہ حکومت کواسٹیبلشمنٹ سے تعلقات کی ضرورت ہوتی ہے، ہم اپوزیشن میں ہیں تو اپوزیشن میں رہتے ہوئے تعلقات کیسے ہو سکتے ہیں؟ پاکستان میں اسٹیبلشمنٹ حقیقت ہے، اس کے پاس تمام اختیارات ہیں۔