آیت اللہ خامنہ ای نے حالیہ فسادات کا ذمہ دار امریکا اور اسرائیل کو قرار دے دیا

ایران کے سپریم لیڈر آیت اللہ خامنہ ای کا کہنا ہے کہ مہسا امینی کی موت سے میرے دل کو گہرا صدمہ پہنچا ہے۔

غیر ملکی خبررساں ایجنسی کے  مطابق گزشتہ روز ایرانی فورسز کے کیڈ ٹس سے خطاب کرتے ہوئے  آیت اللہ خامنہ ای نے کہا کہ مہسا امینی کی موت کو دشمنوں نے اشتعال انگیزی کے لیے استعمال کیا، ایرانی عوام کی حفاظت یقینی بنانا سکیورٹی فورسز کا فرض ہے۔

انہوں نے کہا کہ سکیورٹی فورسز پر حملہ کرنے والے ایرانی عوام کو غیر محفوظ کر رہے ہیں، حالیہ واقعات میں سکیورٹی فورسز اور ایرانی عوام کے ساتھ غلط ہوا،کچھ لوگ سڑکوں پر باقاعدہ منصوبہ بندی کے تحت بد امنی پھیلا رہےہیں۔

ایران کے سپریم لیڈر آیت اللہ خامنہ ای کا کہنا تھا کہ ایران کے حالیہ فسادات ہمارے دشمنوں امریکا اور اسرائیل کی منصوبہ بندی ہے، بدامنی کو ہوا دینے والے سخت قانونی کارروائی اور سزا کے مستحق ہیں۔

واضح رہے کہ مہسا امینی کی ہلاکت کے خلاف ایران میں 17 روز سے مظاہرے جاری ہیں، انسانی حقوق گروپ کے مطابق مظاہروں میں 133 افراد ہلاک ہوئے ہیں۔

ایران میں زیرحراست لڑکی کی ہلاکت پر احتجاج کے دوران ہلاکتوں کی تعداد 133 ہوگئی

انسانی حقوق گروپ کے مطابق زاہدان شہر میں جمعےکو سکیورٹی فورسز کے ساتھ جھڑپوں میں 41 افراد جب کہ دیگر شہروں میں مظاہرین کے خلاف کریک ڈاؤن میں 92 افراد ہلاک ہوئے

دوسری جانب ایرانی حکومت نے سکیورٹی اہلکاروں سمیت 40 سے زائد افراد کے ہلاک ہونےکا بتایا ہے۔

یاد رہے کہ مہسا امینی کو اسکارف پابندی قانون کی خلاف ورزی پر 13 ستمبر کو حراست میں لیا گیا تھا تاہم وہ 16ستمبرکو پولیس کی حراست میں دل کادورہ پڑنے سے انتقال کر گئی  تھیں۔