پاک فوج کے شہدا کیخلاف مہم: 178 اکاؤنٹس پر پی ٹی آئی کا جھنڈا یا نشان پائے گئے

لسبیلہ ہیلی کاپٹر حادثے کے بعد سوشل میڈیا پر پاک فوج کے شہدا کے خلاف مہم کی تحقیقات میں پیشرفت ہوئی ہے۔

دستاویز کے مطابق پاک فوج کے شہدا کے خلاف مہم پر ایف آئی اے کی تحقیقات حتمی مراحل میں داخل ہوگئی ہیں اور کُل 580 اکاؤنٹس کی چھان بین کی گئی، 178 اکاؤنٹس پر پی ٹی آئی کا جھنڈا یا نشان پائے گئے۔

ایف آئی اے دستاویز نے بتایا کہ 18 بھارتی اکاؤنٹس بھی شہدا کے خلاف مہم میں شامل تھے، شناخت شدہ اکاؤنٹس کی تعداد 168 اور جعلی اکاؤنٹس کی تعداد238 ہے۔

ایف آئی اے دستاویز کے مطابق 123 اکاؤنٹس کی شناخت نادرا کے سپرد کردی گئی ہے،  33 اکاؤنٹس دوسرے ممالک سے چلائے جارہے تھے۔

لسبیلہ ہیلی کاپٹر واقعہ: منفی سوشل میڈیا مہم کے تمام کرداروں کی گرفتاریوں کا فیصلہ

پی ٹی آئی کےکارکنوں کی جانب سے پاک فوج کے خلاف مہم چلائی گئی، گھناؤنی مہم چلانے والوں سے تفتیش کے نتیجے میں ان کے سرپرستوں کو بھی قانون کے کٹہرے میں لایا جائے گا: تفتیشی ذرائع

دستاویز میں بتایا گیا ہے کہ ایف آئی اے نے پاک فوج کےخلاف مہم چلانے والے 234 اکاؤنٹس کو شناخت کیا، گوجرانوالا میں 12 انکوائریز میں سے 6 مقدمات درج اور 5 افراد گرفتارہوئے۔

دستاویز کے مطابق فیصل آباد کی 7انکوائریز میں 4مقدمات درج اور 4افراد گرفتار ہوئے جبکہ لاہور کی 7 انکوائریز میں 2 مقدمات درج اور 2افراد گرفتار ہوئے اور4نوٹس جاری کیے۔

خیال رہےکہ گزشتہ دنوں لسبیلہ میں پاکستان آرمی ایوی ایشن کا ہیلی کاپٹر سیلاب زدہ علاقوں میں ریلیف آپریشن کے دوران لاپتہ ہوگیا تھا، کئی گھنٹوں کی تلاش کے بعد ہیلی کاپٹرکا ملبہ موسیٰ گوٹھ سے ملا تھا۔

آئی ایس پی آر نے بتایا تھا کہ ہیلی کاپٹر کو حادثہ خراب موسم کے باعث پیش آیا جس کے باعث ہیلی کاپٹر میں سوار کورکمانڈر کوئٹہ لیفٹیننٹ جنرل سرفراز علی اور ڈی جی پاکستان کوسٹ گارڈ میجر جنرل امجد سمیت 6 جوان شہید ہوگئے تھے۔

ہیلی کاپٹر حادثےکے بعد سوشل میڈیا پر اس حوالے سے منفی مہم چلائی گئی تھی جس کی پاک فوج نے شدید مذمت کی تھی جبکہ حکومت نے منفی سوشل میڈیا مہم کے خلاف کارروائی کا فیصلہ کیا تھا اور ایف آئی اے اور آئی ایس آئی کے افسران پر مشتمل تحقیقاتی ٹیم تشکیل دی تھی جو واقعے کی تحقیقات کر رہی ہے۔