08 اکتوبر ، 2022 
ویمن ٹیم دلیرانہ کرکٹ کھیل کر ایشیا کپ جیت سکتی ہے: نین عابدی
08 اکتوبر ، 2022
پاکستان ویمن کرکٹ ٹیم کی سابق کرکٹر نین عابدی کا کہنا ہے کہ جس طرح پاکستان ویمن ٹیم نے ایشیا کپ میں بھارت کیخلاف کھیلا اگر اس ہی طرح ٹورنامنٹ کھیلتے رہے تو ایشیا کپ جیت سکتے ہیں۔
جیو نیوز سے گفتگو میں نین عابدی نے کہا کہ بھارت کے خلاف پاکستان نے کھیل کے تینوں شعبوں میں شاندار پرفارمنس کا مظاہرہ کرتے ہوئے دلیرانہ کرکٹ کھیلی اور ایک بڑی کامیابی حاصل کی۔
انہوں نے کہا کہ پاکستان ٹیم میں بہت اچھا کمبی نیشن بناہوا ہے جس میں جونیئرز بھی ہیں اور تجربہ کار پلیئرز بھی، ایک مسئلہ جو آرہا تھا وہ پلان پر عملدرآمد کا تھا لیکن بھارت کے خلاف میچ میں اس مسئلے پر بھی قابو رہا، پاکستان ٹیم نے اپنے پلانز پر بھرپور انداز میں عمل درآمد کیا۔
پاکستان ویمن ٹیم کی جانب سے 87 ون ڈے اور 68 ٹی ٹوینٹی کھیلنے والی نین عابدی نے کہا کہ تھائی لینڈ کے خلاف شکست کے بعد جس طرح پاکستان نے انڈیا کو شکست دے کر کامیابی حاصل کی وہ بہت بڑی جیت ہے، پاکستان ٹیم میں بہت ٹیلنٹ ہے، ضرورت ہے کہ اس ٹیم کو ہر کوئی سپورٹ کرے، یہ ٹیم بہت آگے جانے کی صلاحیت رکھتی ہے۔
واضح رہے کہ پاکستان نے جمعہ کو ویمن ایشیا کپ میچ میں بھارت کو 13 رنز سے ہرادیا تھا، میچ میں ندا ڈار، نشرہ سندھو، سعدیہ اقبال اور بسمہ معروف نے شاندار کارکردگی کا مظاہرہ کیا تھا۔
