سائنس و ٹیکنالوجی

وہ فیچر جس کا واٹس ایپ صارفین کو عرصے سے انتظار ہے

ویب ڈیسک

17 اکتوبر ، 2022

یہ فیچر ابھی بیٹا ورژن میں موجود ہے / فائل فوٹو

واٹس ایپ میں بہت جلد ایسا فیچر متعارف ہونے والا ہے جو صارفین کی زندگی آسان بنادے گا۔

ایسا محسوس ہوتا ہے کہ میٹا کی زیرملکیت کمپنی مسلسل نئے فیچرز تیار کرنے میں مصروف رہتی ہے۔

اب ایسے فیچر کے بارے میں رپورٹ سامنے آئی ہے جس پر کئی ماہ سے کام ہورہا ہے اور بظاہر اب یہ متعارف ہونے کے قریب ہے۔

یہ بھی پڑھیں

واٹس ایپ کے نئے اینڈرائیڈ بیٹا ورژن میں میسجز کو ایڈٹ کرنے کا فیچر موجود ہے۔

یہ وہ فیچر ہے جس کا عرصے سے صارفین کو انتظار ہے کیونکہ ابھی کسی میسج میں کوئی غلطی ہوجائے تو اسے ڈیلیٹ کرنے کے سوا کوئی اور آپشن نہیں ہوتا۔

ویسے تو اب ٹوئٹر میں بھی ایک ایڈٹ بٹن کا اضافہ ہوگیا ہے مگر واٹس ایپ صارفین تاحال اس کا انتظار کررہے ہیں۔

WABetaInfo کی ایک رپورٹ کے مطابق اینڈرائیڈ کے نئے بیٹا ورژن میں عندیہ دیا گیا ہے کہ یہ فیچر کس طرح کام کرے گا۔

رپورٹ کے مطابق اس فیچر کے تحت کسی میسج کو بھیجنے کے بعد اسے 15 منٹ کے اندر ایڈٹ کرنا ممکن ہوگا۔

جب کوئی میسج ایڈٹ کیا جائے گا تو وقت کے ساتھ ایک لیبل کے ذریعے اس میں تبدیلی کو واضح کیا جائے گا۔

ایڈٹ ہونے کے بعد میسج ایسے نظر آئے گا / فوٹو بشکریہ WABetaInfo

رپورٹ میں بتایا گیا کہ اس حوالے سے کافی عرصے سے کوئی اپ ڈیٹ سامنے نہیں آئی تھی مگر کمپنی نے اس پر کام جاری رکھا اور جلد اسے صارفین کے لیے متعارف کرایا جاسکتا ہے۔

یہ ایپل کی جانب سے آئی او ایس 16 میں دیے گئے آئی میسج کے ایڈٹ فیچر سے ملتا جلتا محسوس ہوتا ہے۔

ابھی یہ کہنا مشکل ہے کہ یہ فیچر کب تک صارفین کو دستیاب ہوسکتا ہے مگر امید ہے کہ آنے والے مہینوں میں اسے متعارف کرایا جاسکتا ہے۔