19 اکتوبر ، 2022 
ایشیا کپ میں بھارت کو نہ بھیجنے کے اعلان پر پی سی بی کا سخت ردعمل
19 اکتوبر ، 2022
لاہور: پاکستان کرکٹ بورڈ نے بھارت کی جانب سے ایشیا کپ 2023 کے لیے اپنی ٹیم پاکستان نہ بھیجنے کے معاملے پر ایشین کرکٹ کونسل (اے سی سی) کو خط لکھ دیا۔
ذرائع کے مطابق پاکستان کرکٹ بورڈ کی جانب سے اے سی سی کو لکھے گئے خط میں بھارت کی جانب سے ایشیا کپ 2023 کے لیے اپنی ٹیم پاکستان نہ بھیجنے کے معاملے پر شدید تحفظات کا اظہار کیا ہے۔
ذرائع کا بتانا ہے کہ پاکستان کرکٹ بورڈ نے خط میں بی سی سی آئی کے سیکرٹری جے شاہ کے بیان کی مذمت کی ہے۔
ذرائع کا کہنا ہے کہ خط میں پاکستان کرکٹ بورڈ نے اے سی سی کا ہنگامی اجلاس بلانے کا بھی مطالبہ کیا ہے۔
یاد رہے کہ بھارتی کرکٹ بورڈ کے سیکرٹری جے شاہ (جو اے سی سی کے صدر بھی ہیں) نے گزشتہ روز اپنے بیان میں خود ساختہ فیصلہ سناتے ہوئے ایشیا کپ نیو ٹرل وینیو پر کھیلنے کا بیان دیا تھا۔
بھارتی کرکٹ بورڈ کے سیکرٹری جے شاہ کے بیان کے بعد پاکستان کرکٹ بورڈ کا ہنگامی اجلاس طلب کیا گیا تھا جس میں ایشین کرکٹ کونسل سے علیحدگی اور آئندہ برس بھارت میں ہونے والے ایک روزہ ورلڈکپ میں شرکت سے انکار سمیت مختلف آپشنز پر غور کیا گیا۔
