23 اکتوبر ، 2022 
'خواہش ہے پورا اسٹیڈیم سبز ہو'، پاکستانی فین کا مفت شرٹس دینے کا اعلان
23 اکتوبر ، 2022
بھارت کے خلاف میچ میں شرکت کے لیے آنے والے ایک پاکستانی کرکٹ شائق نے میچ دیکھنے کے لیے گراؤنڈ آنے والوں کو مفت شرٹس فراہم کرنے کا اعلان کیا ہے۔
پاکستان اور بھارت کے درمیان ٹی ٹوئنٹی ورلڈکپ کا ہائی وولٹیج میچ آج میلبرن کرکٹ گراؤنڈ میں کھیلا جائے گا، پاکستانی وقت کے مطابق میچ دوپہر ایک بجے شروع ہو گا۔
دونوں ٹیموں کے کپتان اور کھلاڑیوں سمیت دنیا بھر میں کرکٹ شائقین کو امید ہے کہ آج کا میچ بارش سے متاثر نہیں ہو گا اور دو حریف ٹیموں کے درمیان ایک اچھا ٹاکرا دیکھنے کو ملے۔
پاکستان اور بھارت کے درمیان ہونے والے میچ کے تمام ٹکٹس فروخت ہو چکے ہیں اور ایک لاکھ افراد کی گنجائش والا گراؤنڈ کھچا کھچ بھرا ہونے کا امکان ہے۔
جیو نیوز سے گفتگو کرتے ہوئے پاکستانی کرکٹ شائق کا کہنا تھا موسم کچھ بہتر ہوا ہے اور امید ہے کہ آج کا میچ ضرور ہو گا۔
پاکستانی نوجوان کا کہنا تھا آج کا میچ گراؤنڈ میں دیکھنے کے لیے شائقین کے لیے کچھ شرٹس لایا ہوں، جن کے پاس شرٹس نہیں ہوں گی انہیں یہ شرٹس فری میں دوں گا، خواہش ہے کہ میچ میں پورا اسٹیڈیم سبز ہو اور ہم گرین پاور کو شو کریں۔
