23 اکتوبر ، 2022 
کھلاڑیوں گرنا نہیں ہے، ابھی بڑے میچز باقی ہیں، بابر کی ٹیم کی حوصلہ افزائی
23 اکتوبر ، 2022
پاکستان کرکٹ ٹیم کے کپتان بابر اعظم کا کہنا ہے کہ بھارت کے خلاف اچھا میچ ہوا، ہم نے اچھی ایفرٹ کی، ہمارے ہاتھ میں کوشش ہے جو ہم نے کی۔
آئی سی سی مینز ٹی ٹوئنٹی ورلڈکپ کے سپر 12 مرحلے میں بھارت سے شکست کے بعد قومی کرکٹ ٹیم کے کپتان بابر اعظم نے ڈریسنگ روم میں خطاب کرتے ہوئے کہا کہ بھارت کے خلاف میچ میں کچھ غلطیاں ہوئیں اس سے سیکھیں گے۔
پاکستان کرکٹ بورڈ کی جانب سے بابر کے ٹیم سے خطاب کی ویڈیو جاری کی گئی ہے جس میں انہوں نےکھلاڑیوں سے کہا کہ'گرنا نہیں ہے، ابھی بڑے میچز باقی ہیں، یہ نہیں کہنا کہ کسی ایک کی وجہ سے ہارے، یہ ہم سب ہارے ہیں۔ہم بطور ٹیم جیتتے ہیں، ہارتے بھی بطور ٹیم ہیں'۔
بابر اعظم نے محمد نواز کی خصوصی حوصلہ افزائی کرتے ہوئے کہا کہ 'نواز، تو میرا میچ ونر ہے، میرا بھروسہ ہے، پریشر والا اوور تھا، کلوز لایا، ویلڈن، اس شکست کو یہاں چھوڑ کر آگے جانا ہے، اچھا کھیلنا ہے'۔
واضح رہے کہ آئی سی سی ٹی ٹوئنٹی ورلڈ کپ کے سپر 12 مرحلے میں بھارت نے سنسنی خیز مقابلے کے بعد پاکستان کو شکست دی۔
160 رنز کے ہدف کے تعاقب میں بھارت کو پاکستان کے خلاف آخری اوور میں 16 رنز درکار تھے، وہ اوور محمد نواز نے کرایا، جس میں بھارت نے آخری گیند پر ہدف مکمل کرکے 4 وکٹوں سے کامیابی سمیٹی۔
