کھیل

ٹی ٹوئنٹی ورلڈکپ کا فائنل کون کھیلے گا؟ رکی پونٹنگ نے پیشگوئی کردی

05 نومبر ، 2022

مجھے جنوبی افریقا کی پوزیشن بہت بہتر لگ رہی ہے کیونکہ ورلڈ کپ میں سب سے اچھی کارکردگی اسی کی رہی، یہ ٹیم خطرناک لگ رہی ہے: سابق آسٹریلوی کپتان/ فائل فوٹو

آسٹریلیا کے سابق کپتان رکی پونٹنگ نے آئی سی سی ٹی ٹوئنٹی ورلڈکپ کے لیے فائنل کھیلنے والی ٹیموں کے حوالے سے پیشگوئی کی ہے۔

آئی سی سی کے لیے جاری کردہ اپنے کالم میں رکی پونٹنگ نے ٹی ٹوئنٹی ورلڈکپ کے لیے دو فائنلسٹ کے نام بتائے ہیں۔

سابق آسٹریلوی کپتان نے کہا کہ 'یہ بات حتمی تو کوئی نہیں کہہ سکتا کہ ورلڈ کپ کا فائنل کون کھیلنے جارہا ہے، امید ہے کہ آسٹریلیا گروپ میں بہتر پوزیشن کرلے اور فائنل تک رسائی ممکن ہوجائے'۔

رکی پونٹنگ نے کہا کہ 'مجھے جنوبی افریقا کی پوزیشن بہت بہتر لگ رہی ہے کیونکہ ورلڈ کپ میں سب سے اچھی کارکردگی اسی کی رہی، یہ ٹیم خطرناک لگ رہی ہے'۔

یہ بھی پڑھیں

انہوں نے پیشگوئی کی 'میں شروع سے جو بات کہتا آرہا ہوں، اب بھی اس پر قائم رہوں گا کہ ٹی ٹوئنٹی ورلڈکپ کا فائنل آسٹریلیا اور بھارت کے درمیان ہوگا'۔

آسٹریلیا کے سابق کپتان نے مزید کہا کہ 'جب میں کپتان تھا اور ہمارا سامنا کسی بھی بڑی ٹیم سے ہوتا تھا تو میں لڑکوں سے کہتا اس لمحے سے محظوظ ہو، اسے کسی اور کھیل کی طرح نہ لیں'۔

واضح رہے کہ گروپ ون میں پوائنٹس ٹیبل پر نیوزی لینڈ 7 پوائنٹس کے ساتھ سرِفہرست ہے، آسٹریلیا 7 پوائنٹس کے ساتھ دوسرے نمبر پر ہے لیکن رن ریٹ میں نیوزی لینڈ سے پیچھے ہے۔

گروپ ون میں انگلینڈ 5 پوائنٹس کے ساتھ تیسرے نمبر پر ہے، انگلینڈ کو اگر سیمی فائنل میں جگہ بنانی ہے تو آج سری لنکا کو بڑے مارجن سے شکست دینا ہوگی۔