20 نومبر ، 2022 
جعلی پاکستانی پاسپورٹ استعمال کرنے والے غیرملکیوں کے خلاف تحقیقات سست روی کا شکار
20 نومبر ، 2022
جعلی پاکستانی پاسپورٹ پر بیرون ملک جانے والے گرفتار غیر ملکیوں کے خلاف متعلقہ پاکستانی اداروں کی تحقیقات سست روی کا شکار ہیں۔
مذکورہ پاسپورٹس کی ایف آئی آر سمیت درج دیگر مقدمات میں نادرا ریکارڈ کی فراہمی سست روی کا شکار ہے۔
ذرائع کے مطابق ایف آئی اے میں 7 ماہ میں درج متعدد مقدمات کیلئے درکار ریکارڈ نادرا کی جانب سے مبینہ طور پر موصول نہیں ہوا۔
ذرائع کے مطابق ایف آئی اے کی جانب سے نادرا سےطلب کردہ ریکارڈ مبینہ مشتبہ شناختی کارڈز پر سفر کرنے والے مقامی اور غیرملکیوں کے حوالے سے ہے۔
چند ماہ کے دوران کراچی ائیرپورٹ سے مشتبہ پاکستانی سفری دستاویزات پربیرون ملک جانے کی کوشش کرنے پر کئی مسافروں کو گرفتارکیا جا چکا ہے۔
مشتبہ پاکستانی شناختی کارڈز اور پاسپورٹس پر سفر کے الزام میں غیرملکیوں کو بھی گرفتار کیا گیا تھا۔
ذرائع کے مطابق غیرملکیوں کو مبینہ پاکستانی سفری دستاویزات سندھ اور بلوچستان سے جاری کی گئیں۔
ایف آئی اے ذرائع کے مطابق ایک ایف آئی آر میں نامزد 16 پاسپورٹس کی تفصیلات پاسپورٹ ڈائریکٹوریٹ نے ایف آئی اے کو ارسال کی تھیں۔
سدرن ڈائریکٹوریٹ امیگریشن اینڈ پاسپورٹس کے مطابق 16 پاسپورٹس میں سے 12 پاسپورٹس کا ریکارڈ ہی موجود نہیں، ایک پاسپورٹ بنوں جبکہ 3 قمبر شہداد کوٹ کے پاسپورٹ دفاتر سے جاری کئے گئے۔
آن لائن پاسپورٹ ٹریکنگ سسٹم کے مطابق یہ پاسپورٹس جاری ہی نہیں ہوئے۔
مراسلہ کے مطابق جن پاسپورٹس کا ریکارڈ نہیں وہ مبینہ طور پر جعلی ہیں اور متعلقہ پاسپورٹ دفاتر سے جاری ہی نہیں ہوئے۔
16 پاسپورٹس کے ضمن میں 11 قومی شناختی کارڈز کا ریکارڈ بھی دستیاب نہیں ہے۔
