21 نومبر ، 2022 
عمران خان کی جان کو دشمن ممالک کی ایجنسیوں سے خطرہ ہے، رانا ثنا کا انکشاف
21 نومبر ، 2022
وفاقی وزیر داخلہ رانا ثنا اللہ نے کہا ہے کہ عمران خان کی جان کو دشمن ملکوں کی ایجنسیوں سے خطرہ ہے ۔
جیو نیوز کے پروگرام جرگہ میں میزبان سلیم صافی کو انٹرویو دیتے ہوئے رانا ثنا اللہ کا کہنا تھا کہ عمران خان پہلے ہی حکومت اور سکیورٹی اداروں پر الزامات لگا چکے ہیں ، اس صورتِ حال میں ملک دشمن فائدہ اٹھا سکتے ہیں۔
رانا ثنا نے خبردار کیا کہ اگر لانگ مارچ میں مسلح لوگ ہوئے اور انہوں نے فورس پر اسلحہ استعمال کیا تو فورس جوابی کارروائی کرے گی۔
واضح رہے کہ گزشتہ روز لاہور زمان پارک میں صحافیوں سے ملاقات میں گفتگو کرتے ہوئے عمران خان کا کہنا تھاکہ لانگ مارچ اسلام آباد سے راولپنڈی کیوں جا رہا ہے، حکمت عملی جلد سامنے آجائے گی۔
انہوں نے کہاکہ مجھ پر دوبارہ بھی حملہ ہوسکتا ہے لیکن تمام خدشات کے باوجود راولپنڈی پہنچوں گا۔
