’توشہ خانہ تحائف کے خریدار عمر فاروق خریدی گئی قیمتی گھڑی حقیقی مالک کو واپس دینے کو تیار‘
07 دسمبر ، 2022
دبئی میں مقیم ارب پتی تاجر عمر فاروق ظہور نے ایک عام پاکستانی کی حیثیت سے توشہ خانہ کی قیمتی گراف گھڑی اس کے اصل مالک کو واپس کرنے کا ارادہ ظاہر کیا ہے۔
عمر فاروق ظہور نے انکشاف کیا تھا کہ میں نے دبئی میں ایک لین دین کے دوران سابق وزیر اعظم عمران خان کی توشہ خانہ کی قیمتی گراف گھڑی، (وہ مشہور گھڑی جو سعودی ولی عہد شہزادہ محمد بن سلمان نے عمران خان کو تحفے میں دی تھی) فرح خان سے تقریباً 2 ملین ڈالرز میں خریدی تھی۔
اب حال ہی میں دیے گئے ایک انٹرویو میں عمر فاروق ظہور نے اس گھڑی کو خریدتے وقت اپنے جذبات کا اظہار کیا ہے، ان کا کہنا ہےکہ’ میں نے یہ قیمتی گھڑی فخر کے ساتھ خریدی تھی کیوں کہ یہ دنیا کا واحد ٹکڑا ہے جس پر ہمارے مقدس خانہ کعبہ کی تصویر ہے، بطور پاکستانی یہ گھڑی میرے لیے کسی کوہ نور کے ہیرے کی طرح قیمتی اور منفرد تھی اور جب مجھے یہ پتہ چلا یہ گھڑی فروخت کیلئے دستیاب ہے تو میں کسی صورت اس موقع کو گنوانا نہیں چاہتا تھا کیوں کہ جس طرح بذریعہ سوشل میڈیا پلیٹ فارمز دبئی کی مارکیٹس میں اس گھڑی کی مارکیٹنگ کی گئی تھی اس کے لیے مجھے خدشہ تھا کہ یہ گھڑی غلط ہاتھوں میں بھی جا سکتی ہے‘۔
میں نے یہ گھڑی اس کے وقار اور انفرادیت کی وجہ سے خریدی: عمر فاروق
عمر فاروق ظہور کے مطابق’ میں نے یہ گھڑی اس کے وقار اور انفرادیت کی وجہ سے خریدی، یہ ایک محدود ایڈیشن ہے اور یہ گھڑی دنیا کا واحد ٹکڑا ہے جس میں ہمارے مقدس خانہ کعبہ کی تصویر موجود ہے، میں اپنے پاس اس گھڑی کی موجودگی کے باعث خود کو دنیا کا خوش قسمت ترین آدمی سمجھتا ہوں کیوں کہ اس میں ایک روحانی عنصر ہے۔
تاجر کا کہنا تھا کہ میں نے گھڑی کو پوری قوم کی قیمتی ملکیت بنانے کا تصور کیا لیکن ایسا نہیں ہو سکا،جب میں نے دبئی مال میں گراف شاپ پر گھڑی دیکھی اور اس کی صداقت کا جائزہ لیا تو میں سوچ میں پڑ گیا کہ ایک پاکستانی وزیر اعظم یا پھر کوئی حکومت ایسا قیمتی تحفہ کیوں فروخت کرتا چاہتی ہے؟ ایسی گھڑی جس کی قیمت کے ساتھ انتہائی مذہبی اور جذباتی قدر بھی جڑی ہو جبکہ سابق وزیراعظم عمران خان ہمیشہ ریاست مدینہ کی بات کرتے ہیں تو وہ بالاخر اتنا قیمتی ٹکڑا کیسے چھوڑ سکتے ہیں۔
میں ساری عمر اس مقدس گھڑی کا مالک ہونے پر فخر محسوس کروں گا: عمر فاروق
دوران انٹرویو عمر فاروق ظہور نے تجویز بھی پیش کی کہ’ ایک عام پاکستانی اور سعودی عرب کے لیے بطور اظہار تشکر اگر مجھے موقع ملا تو میں یہ گھڑی اس کے حقیقی مالک کو واپس کرنا چاہوں گا تاکہ یہ تنازع ہمیشہ کے لیے ختم ہو جائے‘۔
بزنس مین کے مطابق ’’میں ساری عمر اس مقدس گھڑی کا مالک ہونے پر فخر محسوس کروں گا لیکن اگر اسے واپس کرنے سے یہ تنازع ختم ہو جاتا ہے اورپاک سعودیہ تعلقات میں مدد ملتی ہے تو مجھے اس میں کوئی حرج نہیں۔
عمر فاروق ظہور کا مزید کہنا تھا کہ ’’اگر مجھے ذرا سا بھی اندازہ ہوتا کہ قیمتی چیز کو حاصل کرنے کے بعد مجھ پر اس طرح کیچڑ اچھالا جائے گا تو میں ایسا ہرگز نہ کرتا، میں صرف اس غیر ضروری تنازع کو ختم کرنا چاہتا ہوں کیونکہ اس کے ساتھ میرا کوئی سیاسی ایجنڈا یا کوئی سیاسی مقصدنہیں ہے۔
