23 دسمبر ، 2022 
’اہلکاروں نے لہو کا نذرانہ دیکر دہشتگردوں کو روکا، پوری قوم بہادروں کو سلام پیش کرتی ہے‘
23 دسمبر ، 2022
وزیراعظم شہباز شریف نے اسلام آباد میں ہونے والے خودکش دھماکے کی مذمت کرتے ہوئے کہا کہ پولیس اہلکاروں نے اپنے لہو کا نذرانہ دیکر دہشتگردوں کو روکا۔
وزیراعظم شہباز شریف نے اسلام آباد کے علاقے آئی ٹین فور میں ہونے والے خودکش دھماکے کی مذمت کرتے ہوئے وزیر داخلہ اور آئی جی اسلام آباد سے رپورٹ طلب کرلی اور شہید پولیس اہلکار کو شہدا پیکج دینے کی ہدایت بھی کی۔
وزیراعظم نے اسلام آباد پولیس کے شہید اہلکار عدیل حسین کو خراج عقیدت پیش کرتے ہوئے کہا کہ پولیس اہلکاروں نے اپنے لہو کا نذرانہ دیکر دہشتگردوں کو روکا، قوم اپنے بہادروں کو سلام پیش کرتی ہے۔
شہباز شریف کا کہنا تھا پوری قوم مل کر دہشتگردی کے خاتمے تک جنگ جاری رکھے گی، قانون نافذ کرنے والے اداروں کی کارروائی سے بےگناہوں کا خون بہانےکا منصوبہ ناکام ہو گیا، عوام دہشتگردی کے خاتمے کے لیے اپنی فورسز کے ساتھ بھرپور تعاون کریں۔
یاد رہے کہ اسلام آباد کے علاقے آئی ٹین فور میں پولیس اہلکاروں نے ایک گاڑی کو تلاشی کے لیے روکا تو خود کش حملہ آور نے بارود سے بھری گاڑی کو دھماکا خیز مواد کی مدد سے اڑا دیا جس کے نتیجے میں دونوں خودکش بمبار ہلاک ہو گئے جبکہ ایک پولیس اہلکار نے بھی جام شہادت نوش کیا۔
