آپ کی وہ غلطی جو ہر وقت نزلہ زکام یا دیگر امراض کے شکار بنادیتی ہے

کیا آپ اکثر نزلہ زکام یا ایسی ہی دیگر عام موسمی بیماریوں کے شکار ہوجاتے ہیں؟

اگر ہاں تو اس کی وجہ ہوسکتا ہے کہ آپ کے ہاتھ میں ہی ہو اور وہ ہے اسمارٹ فون۔

یہ بات متحدہ عرب امارات میں ہونے والی ایک نئی تحقیق میں سامنے آئی۔

اسمارٹ فون کو کتنے دن میں صاف کرنا ضروری ہے؟

صفائی کے لیے درست طریقہ کار پر عمل کرنا بھی ضروری ہے ورنہ ڈیوائس کو نقصان پہنچ سکتا ہے۔

محمد بن راشد یونیورسٹی آف میڈیسین اینڈ ہیلتھ سائنسز اور آسٹریلیا کی بونڈ یونیورسٹی کی مشترکہ تحقیق میں بتایا گیا کہ اسمارٹ فون اور اسمارٹ واچ کی صفائی کو یقینی بنانا لوگوں کی صحت کو زیادہ بہتر تحفظ فراہم کرسکتا ہے۔

تحقیق میں دریافت کیا گیا کہ ہاتھوں کی صفائی کا فائدہ اس صورت میں نہیں ہوتا اگر اسمارٹ فون یا دیگر ڈیوائسز کی صفائی کا خیال نہ رکھا جائے۔

تحقیق کے مطابق گرم درجہ حرارت اور ٹچ اسکرین ڈسپلے کی وجہ سے اسمارٹ فونز امراض کا باعث بننے والے جراثیموں کی افزائش کے لیے مثالی ثابت ہوتے ہیں۔

محققین نے بتایا کہ فونز کبھی ہم سے زیادہ دور نہیں ہوتے اور ہم انہیں ہر جگہ ساتھ لے جاتے ہیں، اسی لیے فونز کی صفائی کو عادت بنانا اسی طرح ضروری ہے جس طرح ہم ہاتھوں کی صفائی کا خیال رکھتے ہیں۔

اس تحقیق میں ایک طبی مرکز کے عملے کو شامل کرکے ان کے موبائل فونز اور اسمارٹ واچز کے نمونوں کی جانچ پڑتال کی گئی تھی۔

ان افراد کے ہاتھوں کا جائزہ بھی میٹا جینومکس سیکونسنگ ٹیکنالوجی سے لیا گیا تھا۔

نتائج سے معلوم ہوا کہ ہاتھوں پر موجود جراثیم موبائل فونز اور اسمارٹ واچز پر بھی موجود ہوتے ہیں۔

تحقیق کے مطابق کچھ جراثیم ایسے تھے جو ادویات کے خلاف مزاحمت کی صلاحیت رکھتے تھے جبکہ کچھ ڈیوائسز میں تو کورونا وائرس کو بھی دریافت کیا گیا۔

محققین نے بتایا کہ فونز کی اسکرین پر موجود یہ جراثیم لوگوں کی صحت کے لیے خطرہ ثابت ہوسکتے ہیں مگر موبائل فونز کی صفائی سے اس خطرے کو کم کیا جاسکتا ہے۔

ماہرین نے مشورہ دیا کہ اسمارٹ فون کی صفائی کو معمول بنانا ضروری ہے اور اس مقصد کے لیے sanitisation وائپس کا استعمال کیا جانا چاہیے۔

انہوں نے مزید بتایا کہ چارجنگ کے دوران فون کو صاف کرنے سے گریز کریں۔