ویلنٹائن ڈے پر پشاور زلمی کو ہرا کر کراچی والوں کو تحفہ دینگے: کپتان کراچی کنگز

کراچی کنگز کے کپتان عماد وسیم  14 فروری ویلنٹائن کے روز  بابر اعظم کی پشاور زلمی کی پلیئنگ الیون کو شکست دینے کیلئے پرجوش ہیں۔

حال ہی میں نجی میڈیا سے گفتگو کے دوران عماد وسیم  نے پی ایس ایل 8 کیلئے کراچی کنگز کے پہلے میچ سے متعلق گفتگو کی جس میں ان کا کہنا تھا کہ ہمارے لیے ہر ٹیم سے میچ ایک ہی اہمیت کا حامل ہے لیکن اس بار کراچی اور پشاور زلمی کے میچ کی سوشل میڈیا پر خاصی ڈسکشن ہورہی ہے، کراچی کنگز بھی پشاور کی طرح پرجوش ہے اور جیت کیلئے پشاور زلمی کی طرح ہی محنت کریں گے۔

کپتانی ایماندار ی سے کرنا چاہیے: عماد وسیم  

کراچی کنگز کے کپتان نے کہا کہ  ٹیم کے سارے لڑکے بہترین پرفارمنس  دے رہے ہیں ، لہٰذا ہمیں ویلنٹائن کے روز کراچی والوں کو جیت کر اچھا تحفہ دینا چاہیے، اگر ٹیم اچھا کھیل کر ٹورنامنٹ کا آغاز میں  شروع کے میچز  جیت جائے تو اچھا  مومینٹم سیٹ ہوجاتا ہے ، پی ایس ایل کا نیو سیزن ہے ہمیں  آغاز اچھا کرنا ہوگا۔

پی ایس ایل کے 8 ویں ایڈیشن کے شیڈول کا اعلان ہوگیا، افتتاحی تقریب ملتان میں ہوگی

پہلا میچ ملتان میں 13 فروری کو ملتان سلطانز اور لاہور قلندرز کے درمیان کھیلا جائے گا، فائنل 19 مارچ کو لاہور قذافی اسٹیڈیم میں ہوگا

دوسری جانب کپتانی کے حوالے سے بات کرتے عماد وسیم کا کہنا تھا کہ کراچی کنگز کے کرتا دھرتاؤں کا شکر گزار ہوں کہ انھوں نے ایک بار پھر مجھے کراچی کنگز کی کپتانی کیلئے منتخب کیا، کپتانی کسی بھی کھلاڑی کے لیے ایک بہت بڑی ذمہ داری ہے ساتھ ہی ایک اعزاز بھی ہے، کپتان کا سب سے بڑا کام دوسری ٹیموں کے ساتھ کھیلنے کیلئے حکمت عملی تیار کرنا ہے،  کپتانی ایماندار ی سے کرنا چاہیے جس کے لیے میں دوستی یاری پر یقین نہیں رکھتا،  میری کوشش ہوتی ہے کہ ایسے کھلاڑیوں کو شامل کیا جائے جو ٹیم کیلئے جو بہتر  ہوں اور الحمداللہ ابھی تک لڑکوں کی  پرفارمنس بھی بہت اچھی ہے۔

پی ایس ایل  8 کے شیڈول کا اعلان 

واضح رہے کہ پی ایس ایل شیڈول  کا اعلان کردیا گیا ہے جس کے مطابق پہلا میچ لاہور قلندرز اور ملتان سلطانز کے درمیان 13 فروری کو ملتان میں  جبکہ دوسرا میچ 14 فروری کو  پشاور زلمی اور کراچی کنگز کے درمیان کراچی میں کھیلا جائے گا۔

34 میچز میں سے 11 میچز راولپنڈی میں ہوں گے، کراچی اور لاہور میں 9، 9 میچز جبکہ ملتان میں 5 میچز کھیلے جائیں گے۔

پاکستان سپر لیگ کا فائنل 19 مارچ کو قذافی اسٹیڈیم لاہور میں ہوگا۔