39 کروڑ سے زائد کا بل بننے پر چنیسر گوٹھ کی بجلی کاٹی: کے الیکٹرک کی وضاحت
28 جنوری ، 2023
کراچی میں بجلی کی تقسیم کار کمپنی کے الیکٹرک نے کہا ہے کہ چنیسر گوٹھ اور معصوم شاہ کالونی کے لوگوں پر 39 کروڑ 75 لاکھ کا بل بن گيا ہے، اس لیے ان علاقوں کی بجلی کاٹی۔
گزشتہ روز بجلی کی لوڈشیڈنگ کے خلاف کالا پل پر چنیسرگوٹھ اوراطراف کے رہائشیوں نے احتجاج کیا تھا۔
احتجاج کے باعث شارع فیصل سے نیشنل میڈیکل سینٹر تک روڈ ٹریفک کیلئے بند کردیا گیا تھا اور شاہراہ فیصل پر گھنٹوں ٹریفک متاثر رہی۔
اس حوالے سے کے الیکٹرک کے ترجمان کا کہنا تھاکہ چنیسرگوٹھ اورمعصوم شاہ کالونی میں عدم ادائیگیوں پربجلی منقطع کی گئی، منقطع علاقوں پر واجب الادا رقم 39 کروڑ75 لاکھ سےزیادہ ہے۔
ترجمان کےالیکٹرک کا کہنا تھاکہ علاقہ مکین وقت پربجلی کےبلوں کی ادائیگی یقینی بنائیں، وقت پرکی گئی بلوں کی ادائیگیاں بجلی کی بہترفراہمی میں مددگارہوتی ہیں۔
دوسری جانب صوبائی وزیرسعیدغنی نے اپنےحلقے میں بجلی کےکئی فیڈرزبندش کی مذمت کی اور کہا کہ معصوم شاہ کالونی، چنیسرگوٹھ،لیاقت اشرف کالونی، ہل ایریا میں گھنٹوں سے بجلی بند ہے اور بجلی کی جبری بندش کے سبب پورے علاقے میں پانی کی فراہمی معطل ہے، بیمارافراد،بزرگ اور بچےکےالیکٹرک کےظلم کی وجہ سےکرب میں مبتلا ہیں۔
ان کا کہنا تھاکہ بجلی کی بندش سےکوئی جانی نقصان ہوا تو مقدمہ کے الیکٹرک افسران پردرج کروایا جائےگا۔
