15 فروری ، 2023 
شاداب بطور کپتان ہمیشہ ایک قدم آگے ہوتا ہے: کوچ اسلام آباد یونائیٹڈ
15 فروری ، 2023
اسلام آباد یونائیٹڈ کے ہیڈ کوچ اور سابق ٹیسٹ کرکٹر اظہر محمود کا کہنا ہے شاداب خان بطور کپتان ہمیشہ ایک قدم آگے ہوتا ہے اور ہم کراچی کے خلاف میچ جیتنے کی پوری کوشش کریں گے۔
اسلام آباد یونائٹیڈ کے ہیڈ کوچ اظہر محمود کا پریس کانفرنس کرتے ہوئے کہنا تھا پی ایس ایل کے میچز ہمیشہ کافی اچھے ہوتے ہیں جو خوش آئند بات ہے، اس طرح کے میچز سے اچھا میسج جاتا ہے کہ یہ مضبوط لیگ ہے۔
ان کا کہنا تھا ہم کل جیتنے کی کوشش کریں گے، کراچی ایک میچ ہارا ہے وہ پریشر میں ہو گا، کراچی نے کل اچھی کرکٹ کھیلی ہے، شعیب ملک اور عماد نے کوالٹی مقابلہ کیا۔
ایک سوال کے جواب میں اظہر محمود کا کہنا تھا پاکستان کے لیے ہمیشہ حاضر ہوں، اگر کچھ بات ہوئی تو دیکھیں گے۔
ان کا کہنا تھا لائٹس اور نمی میں کیچ پکڑنا مشکل ہو جاتا ہے اور سخت میچوں میں فیلڈنگ کا کردار کافی اہم ہوتا ہے، ایک اچھا کیچ اور اچھا رن آؤٹ میچ بدل سکتا ہے۔
اظہر محمود کا کہنا تھا ہماری تیاری اچھی ہے، کھلاڑی کھیلتے آ رہے ہیں، ہم ٹیم کو منتخب کرتے ہوئے کافی چیزوں کا خیال رکھتے ہیں، کوشش اور خواہش ہے کہ ایک بار پھر اسلام آباد کو چیمپئن بناؤں۔
انہوں نے کہا کہ کپتانی کا اندازہ اس وقت ہوتا ہے جب میدان میں ہوتے ہیں، شاداب بطور کپتان ہمیشہ ایک قدم آگے ہوتا ہے، پچھلے سال انجری کی وجہ سے ہمارا کامبی نیشن بگڑا تھا۔
