جنگوں میں بھی ملکی معیشت اتنی خراب نہیں ہوئی جتنی آج ہے: حماد اظہر

اسلام آباد: پی ٹی آئی رہنما اور سابق وزیر خزانہ حماد اظہر نے کہا ہےکہ جنگوں میں بھی پاکستان کی معیشت اتنی خراب نہیں ہوئی جتنی آج ہے۔

ایک بیان میں حماد اظہر نے کہا کہ عالمی منڈی میں پیٹرول اور ڈیزل کی قیمتیں کم ہوئی ہیں،  جب پیٹرول عالمی منڈی میں 113 ڈالر پر تھا تو پاکستان میں پیٹرول کی قیمت 150 روپے تھی، آج عالمی منڈی میں پیٹرول 80 ڈالر پر ہے اور پاکستان میں 272 روپے قیمت ہوگئی، 9 ماہ اور خاص طور پر 30 دن میں روپیہ ڈالر کے مقابلے میں 90 روپے قدر کھو بیٹھا ہے۔

پیٹرولیم مصنوعات کی قیمت میں 22 روپے سے زائد کا اضافہ

پیٹرول کی قیمت میں 22 روپے 20 پیسے کا اضافہ کیا گیا ہے : اعلامیہ

انہوں نے کہا کہ پی ڈی ایم کی غلط پالیسیاں ہیں، پہلے مفتاح اسماعیل پھر اسحاق ڈار نے معاشی بحران کی بنیاد رکھی، یہ لوگ عوام میں سے منتخب نہیں ہوئے اس لیے ان کو عوام کی کیا فکر، ہمارے دور میں پیٹرول کی قیمت 4 روپے بڑھانی تھی تو کابینہ میں ایک گھنٹہ بحث ہوئی،  یہ ایک جھٹکے میں 20،30 روپے بڑھا دیتے ہیں ان کو کوئی پرواہ نہیں۔

حماد اظہر کا کہنا تھا کہ معیشت چل نہیں رہی اور ملک ڈیفالٹ کے دہانے پر کھڑا ہے، ان کا ردعمل یہ ہے کہ اعظم سواتی، شوکت ترین اور عمران خان کو گرفتار کرلو  آڈیو نکال لو ، ویڈیو نکال لو، ان کونہ سیاست کی سمجھ ہے، نہ معیشت اور نہ تاریخ کا علم ہے، بجلی کی قیمتوں میں اضافہ اس لیے کیا گیا کہ انہوں نے ڈالر انڈیکس معاہدے کیے تھے۔ 

سابق وزیر کا کہنا تھا کہ جنگوں میں بھی پاکستان کی معیشت اتنی خراب نہیں ہوئی جتنی آج ہے، اسحاق ڈار نے جو امپورٹ بند کی ابھی تو اس کے بھی اثرات آنے ہیں، ہر چیز انہوں نے عوام کی پہنچ سے دور کردی اور ان کے فلسفے سنیں۔