خواہش ہے پی ایس ایل میں ایک سنچری ضرور کروں: نوجوان بیٹر طاہر بیگ

کراچی : پاکستان سپر لیگ (پی ایس ایل) فرنچائز لاہور قلندرز  کے اسکواڈ میں شامل نوجوان بیٹر  مرزا طاہر بیگ کا کہنا ہے کہ قلندرز کے پلیئرز ڈویلپمنٹ پروگرام کی بدولت یہاں تک پہنچا ہوں۔

مرزا طاہر بیگ نے جیو نیوز سے گفتگو میں کہا کہ بچپن سے کرکٹ کھیل رہا ہوں، لوکل لیول پر ہی کرکٹ کھیلی تھی، تین چار سال سے ٹرائلز  دے رہا تھا، گزشتہ سال ہونے والے ٹرائلز میں میرا انتخاب ہوگیا۔

نوجوان بیٹر نے کہا کہ لاہور قلندرز کی جانب سے سب کچھ دیا گیا، انٹرنیشنل ٹورز  بھی کرائے گئے، لاہور قلندرز کے ڈویلپمنٹ اسکواڈ کے ساتھ نمیبیا کا دورہ کیا تھا۔

لاہور قلندرز کے چیف ایگزیکٹو عاطف رانا کی ہاکی اولمپئن اصلاح الدین سے ملاقات

ملاقات کے دوران قلندرز ہاکی ڈویلپمنٹ پروگرام سے متعلق پلانز پر اظہار خیال کیا گیا

انہوں نے کہا کہ پہلی بار  پی ایس ایل کھیل رہا ہوں، کافی پر جوش ہوں، ٹیم کو جتوانا چاہتا ہوں، نمیبیا میں انٹرنیشنل کھلاڑیوں سے مقابلہ کیا جس نے کافی اعتماد دیا،  قلندرز کے ساتھ دورے میں بہت کچھ سیکھنے کو  ملا، قلندرز کا پلیئرز  ڈویلپمنٹ پروگرام نوجوان کرکٹرز کیلئے امید کی ایک کرن ہے۔

مرزا طاہر بیگ نے کہا کہ میں ایک مثال ہوں، کافی عرصہ اسٹرگل کیا اور آج یہاں ہوں، اگر آپ ٹیلنٹ رکھتے ہیں تو قلندرز  ضرور سپورٹ کرتا ہے، کوشش ہے کہ ٹیم کیلئے بہترین کروں اور میچ جتواؤں،  اگر  یہاں اچھا پرفارم کیا تو  یقین ہے کہ آگے بھی چانس ملے گا۔

نوجوان کھلاڑی نے کہا کہ ٹیم میں ٹاپ پلیئرز سے بہت کچھ سیکھنے کو مل رہا ہے، پریشر کو کیسے ہینڈل کرنا، کرکٹ میں کس طرح سروائیو کرنا ہے، یہ سب کچھ سیکھ رہا ہوں۔

مرزا طاہر نے کہا کہ افسوس ہے کہ کل کراچی کیخلاف میں نے وکٹ گنوائی، میں آؤٹ نہ ہوتا تو لاہور قلندرز کو میچ جتوا سکتا تھا، بدقسمت تھا کہ گیند ہیلمنٹ کو  لگ گیا اور میں کیچ آؤٹ ہوگیا، کراچی کے میچ میں جو غلطیاں ہوئیں کوشش کریں گے کہ انہیں نہ دہرائیں۔

انہوں نے کہا کہ کراچی کی کنڈیشنز سمجھتے ہیں، کوئٹہ کیخلاف مثبت کرکٹ کھیلیں گے، خواہش ہے کہ پی ایس ایل میں ایک سنچری ضرور کروں۔