ٹی ٹوئنٹی کرکٹ میں نو بال جرم ہے، وہاب ریاض

پاکستان سپر لیگ( پی ایس ایل) کی ٹیم پشاور زلمی کے فاسٹ بولر وہاب ریاض کا کہنا ہے کہ کوئٹہ گلیڈی ایٹرز کے خلاف ہم پلان کے مطابق کھیلے اور کامیابی حاصل کی۔

پیر کو پی ایس ایل کے 9 ویں میچ میں پشاور زلمی نے کوئٹہ گلیڈی ایٹرز کو 4 وکٹوں سے شکست دی۔

پشاور زلمی نے ٹاس جیت کر کوئٹہ کو بیٹنگ کی دعوت دی اور کوئٹہ نے مقررہ اوورز میں 4وکٹوں کے نقصان پر 154 رنز بنائے۔کوئٹہ کی جانب سے افتخار احمد 50، سرفراز احمد 39 اور اوڈین اسمتھ 25 رنز بناکر نمایاں رہے۔

پشاور کی جانب سے عثمان قادر نے 2 وکٹیں لیں۔ جواب میں پشاور نے ہدف 18.3 اوورز میں 6 وکٹوں کے نقصان پر حاصل کرلیا۔

 میچ کے بعد پریس کانفرنس کرتے ہوئے وہاب ریاض نے کہا کہ کوئٹہ کیلئے افتخار احمد اور سرفراز نے اچھی بیٹنگ کی، افتخار اچھی فارم میں ہے، اس کو رنز کرتا دیکھ کر اچھا لگ رہا ہے جبکہ صائم ایوب نوجوان ہے ، اس کا اچھا مستقبل ہے۔

انہوں نے کہا کہ کوشش ہے کہ پی ایس ایل میں  پرفارمنس دے کر کم بیک کروں، ٹی ٹوئنٹی کرکٹ میں نو بال جرم  ہے، ہر بولر ہر روز پرفارم نہیں کرتا، ٹی ٹوئنٹی کرکٹ میں مار تو پڑتی ہے، مار پڑ جانا بڑی بات نہیں، غلطیاں سدھارنا ضروری ہے، غلطیوں پر قابو پانا ہوگا۔

وہاب ریاض کا کہنا تھا کہ  ہم ہمیشہ ایک ایک میچ کو لے کر اطمینان سے آگے جاتے ہیں۔

انہوں نے کہا کہ کپتان کوئی بھی ہو گراؤنڈ پر پرفارم کرنا تو پلیئر کا کام ہے،کھلاڑیوں کیلئے اہم ہے کہ وہ میچ کی صورتحال کو پڑھ کر پلان کریں، پلیئرز کو انجری ہونا گیم کا حصہ ہے۔

ان کا کہنا تھا کہ پاکستان کھیلنے کی خواہش مجھے طاقت دیتی ہے، جس دن یہ خواہش نہ رہی اس دن کھیلنے کا مزہ نہیں ہوگا، کرکٹ میری زندگی ہے، کرکٹ کی وجہ سے ہی سب کچھ ہوں۔