21 فروری ، 2023 
چیف الیکشن کمشنرکیلئے چیئرمین نیب کے استعفے میں بڑا پیغام ہے: فواد چوہدری
21 فروری ، 2023
پاکستان تحریک انصاف (پی ٹی آئی) کے رہنما فواد چوہدری کا کہنا ہےکہ چیف الیکشن کمشنر کے لیے چیئرمین نیب کے استعفے میں بڑا پیغام ہے، چیئرمین نیب کا استعفیٰ فاشسٹ نظام کے ٹوٹنے کی طرف بڑا قدم ہے۔
ایک بیان میں فواد چوہدری کا کہنا تھا کہ آفتاب سلطان نے اپنے کام میں 'مداخلت' کے خلاف استعفیٰ دیا، چیئرمین نیب کا استعفیٰ تحریک انصاف کے موقف کی واضح توثیق ہے، میں ان 22 افسران کو جن کو پنجاب میں مداخلت کے لیے لگایا گیا ہے،کہتا ہوں کہ وہ بھی خودکو اس نظام سے علیحدہ کریں، یہ ملک اور بیوروکریسی دونوں کے مفاد میں ہے۔
فواد چوہدری کا کہنا تھا کہ ہم روزِ اول سے کہہ رہے ہیں کہ نظامِ احتساب کی تباہی این آر او دے کر لائے گئے مجرموں کا کلیدی ہدف ہے، ان مجرموں نے سازش سے اقتدار ملتے ہی سب سے پہلے نیب کو تباہ کیا، اپنے 11 سو ارب روپےکی چوری بچانے کے لیے انہوں نے نیب قانون میں نہایت شرمناک ترامیم کیں۔
ان کا کہنا تھا کہ لازم ہےکہ ریاستی ادارے مجرموں کے اشاروں پرکھیلنےکے بجائے آئین و قانون کی بالادستی کی راہ اختیارکریں، کٹھ پتلی راج ان شاءاللہ جلد انجام کو پہنچےگا، ریاست اور عوام کو آگے بڑھنا ہے۔
