لاہور قلندرز نے ہمیں آؤٹ کلاس کیا،کوچ اسلام آباد یونائیٹڈ اظہر محمود

اسلام آباد یونائیٹڈ کے ہیڈ کوچ اظہر محمود کا کہنا ہے کہ لاہور قلندرز نے ہمیں آؤٹ کلاس کیا، ہمیں ضرور مایوسی ہوئی ہے،اس میچ کے بعد ہمیں آگے بڑھنا ہے۔

گزشتہ روز ایچ بی ایل پاکستان سپر لیگ (پی ایس ایل) سیزن 8 کے 16 ہویں میچ میں لاہور قلندرز نے یکطرفہ میچ میں اسلام آباد یونائیٹڈ کو 110 رنز سے شکست دے کر پوائنٹس ٹیبل پر پہلی پوزیشن حاصل کرلی۔

لاہور قلندرز نے اسلام آباد یونائیٹڈ کے خلاف ٹاس جیت کر بیٹنگ کا فیصلہ کیا۔ لاہور قلندرز نے اسلام آباد یونائیٹڈ کو جیت کیلئے 201 رنز کا ہدف دیا۔

جواب میں اسلام آباد کا کوئی بھی کھلاڑی لاہور کے بولرز کے سامنے جم کر نہ کھیل سکا اور پوری ٹیم 90 پر آؤٹ ہوگئی۔

میچ کے بعد پریس کانفرنس کرتے ہوئے اسلام آباد یونائیٹڈ کے ہیڈکوچ اظہر محمود نے کہا کہ لاہور قلندرز نے ہمیں آؤٹ کلاس کیا،ہمیں ضرور مایوسی ہوئی ہے،اس میچ کے بعد ہمیں آگے بڑھنا ہے۔

ان کا کہنا تھا کہ لاہور قلندرز نے پہلے بیٹنگ اچھی کی پھر بولنگ شاندار کی، ہمیں اپنی غلطیوں سے سیکھنا ہوگا، قلندرز کا بولنگ اٹیک ورلڈ کلاس ہے، شاہین آفریدی اور حارث رؤف کے ساتھ ڈیوڈ ویزے نے بھی عمدہ بولنگ کی۔

انہوں نے کہا کہ اسلام آباد یونائیٹڈ کا آغاز اچھا تھا لیکن اس کے بعد یکے بعد دیگرے وکٹیں گریں ۔

اظہر محمود کا کہنا تھا کہ فہیم اشرف اب بھی پاکستان کے بہترین آل راؤنڈر ہیں، وکٹ میں کوئی مسئلہ نہیں تھا، ہمیں اپنے شاٹس کی طرف دیکھنا ہوگا۔

لاہور قلندرز کے 201 رنز کے جواب میں اسلام آباد یونائیٹڈ 90 پر ڈھیر

لاہور قلندرز نے یکطرفہ میچ میں اسلام آباد یونائیٹڈ کو 110 رنز سے شکست دے کر پوائنٹس ٹیبل پر پہلی پوزیشن حاصل کرلی

اسلام آباد یونائیٹڈ کے کوچ نے مزید کہا کہ شاداب خان کے ری ایکشن سے لگا کہ بیٹ کو بال ٹچ نہیں کی لیکن امپائر کا فیصلہ ہے ہمیں اس کو تسلیم کرنا ہے جبکہ اعظم خان اور آصف علی امپیکٹ پلیئرز ہیں، یہ پلیئرز ہر میچ نہیں جتوایا کرتے، دنیا بھر کے امپیکٹ پلیئرز 10 میں سے 3،4 میچز ہی جتواتے ہیں۔

انہوں نے کہا کہ اگلے میچ کے لیے ایلیکس ہیلز آجائیں گے اور پھر ہم اپنا کمبی نیشن دیکھیں گے۔