05 مارچ ، 2023 
پولیس مقابلے میں ہلاک ملزم کی ایک ماہ میں شناخت نہ ہوسکی، شہریوں سے مدد طلب
05 مارچ ، 2023
کراچی ائیرپورٹ کے قریب پولیس مقابلے میں ہلاک ملزم کی ایک ماہ گزر جانے کے باوجود شناخت نہیں ہوسکی۔
اس پولیس مقابلےکی تفتیش ڈسٹرکٹ کورنگی کے کورنگی انڈسٹریل ایریا تھانے کے ایس ای او انسپکٹر امجد یامین کر رہے ہیں۔
ضلع کورنگی انویسٹی گیشن پولیس کے مطابق جناح ٹرمینل جانے والے گرین بیلٹ روڈ پر 6 فروری کو اسم سکونت نامعلوم شخص پولیس سے مقابلے میں ہلاک ہو گیا تھا۔
واقعہ کا مقدمہ نمبر 11/2023 زیر دفعہ 353، 354، 186، 34 اور انسداد دہشت گردی کی دفعہ 7 اے ٹی اے کے تحت درج کیا گیا تھا اور تفتیش کورنگی انڈسٹریل ایریا تھانے کے ایس ای او کو منتقل کی گئی تھی۔
پولیس کے مطابق کوشش کے باوجود ملزم کی شناخت نہیں ہو سکی، ہلاک ملزم کی لاش گورا قبرستان کے قریب چھیپا سرد خانے میں رکھی گئی ہے۔
کورنگی انڈسٹریل ایریا انویسٹی گیشن پولیس کی جانب سے کراچی کے تمام تھانوں کو ملزم کی لاش کی تصاویر بھیجی گئی ہیں اور شہریوں سے بھی لاش کی شناخت میں مدد کی اپیل کی گئی ہے۔
