کھیل

وہاب ریاض کی کوئٹہ گلیڈی ایٹرز کیلئے کی گئی پیشگوئی سچ ثابت

06 مارچ ، 2023

پاکستان کرکٹ ٹیم کے فاسٹ بولر وہاب ریاض نے پاکستان سپر لیگ شروع ہونے سے قبل پی ایس ایل کی ٹیم کوئٹہ گلیڈی ایٹرز کے لیے ایک پیشگوئی کی تھی جو بظاہر اب سچ ثابت ہورہی ہے۔

گزشتہ ماہ کوئٹہ میں پاکستان سپر لیگ کے نمائشی میچ میں پشاور زلمی اور کوئٹہ گلیڈی ایٹرز کی ٹیمیں مدمقابل ہوئیں۔

نمائشی میچ میں کوئٹہ گلیڈی ایٹرز کے افتخار احمد نے زلمی کے فاسٹ بولر اور پنجاب کے وزیر کھیل وہاب ریاض کو ایک ہی اوور میں 6 چھکے جڑ دیے تھے۔

افتخاراحمد نے 50 گیندوں پر94 رنز کی ناقابل شکست جارحانہ اننگز کھیلی۔نمائشی میچ میں کوئٹہ گلیڈی ایٹرز نے پشاور زلمی کو 3 رنز سے شکست دی۔

تاہم میچ کے بعد وہاب ریاض نے افتخار احمد کے ساتھ خوشگوار انداز میں گفتگو کرتے ہوئے افتخار کے زیب تن کیے کوئٹہ گلیڈی ایٹرز کی جرسی کو ہاتھ لگاتے ہوئے کہا تھا کہ 'یہ جامنی رنگ پہنا ہوا ہے نہ یہ پی ایس ایل میں نہیں چلے گا جو مرضی ہوجائے'۔

بظاہر وہاب کا مطلب تھا کہ پی ایس ایل میں کوئٹہ گلیڈی ایٹرز کی ٹیم اچھا پرفارم نہیں کرے گی، زلمی کے فاسٹ بولر کی پیش گوئی پر افتخار احمد نے کہا تھا کہ یہ ٹاپ کرے گا ٹاپ'۔

پی ایس ایل کے آٹھویں سیزن کا میلہ جاری ہے اور وہاب ریاض کی کوئٹہ کے لیے کی گئی پیش گوئی سچ ثابت ہورہی ہے کیوں کہ رواں سیزن میں گلیڈی ایٹرز پوئنٹس ٹیبل پر سب سے نیچے دکھائی دے رہی ہے۔

کوئٹہ گلیڈی ایٹرز نے اب تک 7 میچز کھیلے ہیں جس میں اسے 6 میں شکست کا سامنا کرنا پڑا جبکہ وہ صرف ایک میچ جیتنے میں کامیاب ہوئی ہے۔

واضح رہے کہ لاہور قلندرز اور اسلام آباد یونائیٹڈ پی ایس ایل کے پلے آف مرحلے میں کوالیفائی کرچکی ہیں ،بظاہر کوئٹہ کا اگلے مرحلے میں پہنچنا ایک معجزے سے کم نہ ہوگا۔