اسرائیل کے ساتھ تعلقات خودمختار فلسطینی ریاست سے مشروط ہیں، شہزادہ ترکی الفیصل

سعودی عرب کے سابق انٹیلی جنس چیف شہزادہ ترکی الفیصل نے مغربی ممالک کی دوہری پالیسیوں پر شدید تنقید کر دی ہے۔

فرانسیسی ٹی وی کو انٹرویو کے دوران سعودی عرب کے سابق انٹیلی جنس چیف شہزادہ ترکی الفیصل نے کہا کہ مغربی دنیا نے عجیب دوہری پالیسیاں اپنائی ہوئی ہے۔

انہوں نے کہا کہ پوری مغربی دنیا نے روس کے خلاف تمام تر پابندیاں عائد کردی ہیں لیکن 50 برسوں میں اسرائیل پر مغرب نے ایک پابندی تک عائد نہیں کی۔

سعودی عرب سے تعلقات کے امکانات پر اسرائیلی وزیراعظم کی امریکا سے بات چیت

نیتن یاہو ایران کا مقابلہ کرنے کیلئے خطے میں اسرائیل کے تعلقات بڑھانا چاہتے ہیں: امریکی میڈیا

سعودیہ کے سابق انٹیلی جنس چیف نے مزید کہا کہ میڈیا میں سعودی، اسرائیل تعلقات کے قیام پرشائع رپورٹس صرف صحافتی باتیں ہیں۔

شہزادہ ترکی الفیصل نے مزید کہا کہ اسرائیل کے ساتھ تعلقات کیلئے سعودی عرب نے واضح شرائط رکھی ہیں، اسرائیل کے ساتھ تعلقات کا قیام خودمختار فلسطینی ریاست سے مشروط ہے۔

ان کا کہنا تھا کہ وہ فلسطینی ریاست جس کا دارالحکومت بیت المقدس ہو اور فلسطینی پناہ گزینوں کی واپسی ہو، یہ شرائط مرحوم شاہ عبداللہ بن عبدالعزیز کی جانب سے پیش کردہ امن منصوبے کا حصہ ہے۔