18 مارچ ، 2023 
مجھے گرفتار کرنےکا منصوبہ بنایا گیا ہے: عمران خان
18 مارچ ، 2023
چیئرمین پاکستان تحریک انصاف (پی ٹی آئی) عمران خان کا کہنا ہےکہ مجھے گرفتار کرنےکا منصوبہ بنایا گیا ہے، تمام مقدمات میں عدالت سے ضمانت حاصل کرنےکے باوجود حکومت مجھے گرفتار کرنا چاہتی ہے۔
ایک بیان میں عمران خان کا کہنا تھا کہ حکومت کی تمام تر بدنیتی کے باجود میں عدالت میں پیشی کے لیے اسلام آباد جا رہا ہوں کیونکہ میں قانون کی حکمرانی پر یقین رکھتا ہوں، بدقسمتی سے راستے میں ایک حادثے کے باعث کچھ تاخیر ہوگئی۔
عمران خان کا کہنا تھا کہ یہ واضح ہوچکا ہےکہ لاہور میں کیے جانے والے محاصرے کا مقصد ایک مقدمے میں مجھے عدالت میں پیش کرنا نہیں بلکہ مجھے گرفتار کرکے جیل میں ڈالنا تھا تاکہ میں اپنی انتخابی مہم نہ چلاسکوں۔
ایک ٹوئٹ میں عمران خان کا کہنا تھا کہ پنجاب پولیس نے زمان پارک میں ان کےگھر پر حملہ کیا ہے، زمان پارک کےگھر میں بشریٰ بیگم اکیلی تھیں، یہ کس قانون کے تحت کر رہے ہیں؟
عمران خان کا کہنا تھا کہ یہ لندن پلان کا حصہ ہے، نواز شریف کا مطالبہ ہے کہ مجھے جیل میں ڈالا جائے تاکہ الیکشن میں حصہ نہ لے سکوں۔
