22 مارچ ، 2023 
جب ضمیر نہیں کانپتے، زمین کانپ جاتی ہے: عمران عباس
22 مارچ ، 2023
پاکستانی اداکار عمران عباس نے ملک کے مختلف شہروں میں آنے والے زلزلے پر اپنے خیالات کا اظہار کرتے ہوئے کہا کہ جب ضمیر نہیں کانپتے تو زمین کانپ جاتی ہے۔
گزشتہ روز ملک کے مختلف حصوں میں آنے والے شدید زلزلے کے نتیجے میں 9 افراد جاں بحق ہوئے تھے ایسے میں شوبز انڈسٹری سے تعلق رکھنے والی شخصیات نے بھی گہرے دکھ اور ہمدردی کا اظہار کیا ہے۔
اداکار عمران عباس نے اپنے انسٹا گرام اکاؤنٹ پر ایک پوسٹ شیئر کی جس میں انہوں نے اپنے خیالات کا اظہار کرتے ہوئے لکھا کہ جب ضمیر نہیں کانپتے، زمین کانپ جاتی ہے۔
انہوں نے مزید لکھا کہ اللہ کے عذاب سے ڈرو، یہ ظلم یہ جبر چھوڑ دو، نہ جانے کتنے لوگوں پر ظلم کی انتہا کررہے ہو، کتنوں کی جان لے رہے ہو اور کس کس کی جان لینے کی سازش کررہے ہو، کیوں موت کو بھول بیٹھے ہو، توبہ کرو اور پھر سوچ لو کہ اللہ چاہے تو ایک لمحے میں تم سب کو بھی مٹی کے ڈھیر میں دفن کرسکتا ہے۔
اداکار کی جانب سے اپنی طویل پوسٹ کے آخر میں یہ بھی لکھا گیا کہ وقت ہے پھر سوچ لو، کہیں ایسا نہ ہو کہ توبہ کی فرست بھی نہ ملے۔
