01 اپریل ، 2023 
کراچی: سائٹ ایریا کی فیکٹری میں زکوٰۃ تقسیم کے دوران بھگدڑ میں اموات کے واقعہ کا مقدمہ درج
01 اپریل ، 2023
کراچی میں نجی فیکٹری میں بھگدڑ مچنے سے 12 افرادکی اموات کے واقعہ کا مقدمہ سائٹ اے تھانے میں درج کر لیا گیا۔
کراچی سائٹ ایریا میں نجی فیکٹری میں راشن اور زکوٰۃ کی تقسیم کے دوران بھگدڑ مچنے سے 9 خواتین اور 3 بچوں سمیت 12 افراد کی اموت کے واقعہ کا مقدمہ سرکار کی مدعیت میں درج کر لیاگیا ۔
پولیس کے مطابق مقدمہ فیکٹری مالک اور دو منیجر سمیت 9 افراد کے خلاف درج کیا گیا۔
مقدمےمیں لاپرواہی اور غفلت کی دفعات شامل کی گئی ہیں،متن کے تحت فیکٹری انتظامیہ نے زکوٰۃ تقسیم کے حوالے سے پولیس اور ضلعی انتظامیہ کو لاعلم رکھا، زکوٰۃ تقسیم کے دوران چوکیدار نے مین گیٹ کے ساتھ چھوٹا گیٹ کھولا تو خواتین اور بچے اندر داخل ہوئے تو بھگدڑ مچ گئی۔
مقدمے میں نامزد ملزموں میں سے تاحال 8 ملزم گرفتار ہیں۔
دوسری جانب ضلعی انتظامیہ نے واقعہ کی تفتیشی رپورٹ تیار کرلی۔
رپورٹ کے مطابق فیکٹری انتظامیہ نے ضلعی انتظامیہ سے این او سی بھی حاصل نہیں کیا تھا،زکوٰۃ تقسیم کے وقت ہجوم فیکٹری کے اندر تھا، فیکٹری کا گیٹ بھگدڑ کے وقت بند تھا،فیکٹری میں پانی بھی جمع تھا۔
اے ڈی سی ون کیماڑی نے رپورٹ کمشنر کراچی کو ارسال کر دی۔
