02 اپریل ، 2023 
علی امین گنڈا پور کیلئے ڈی آئی خان سے اسلحہ لاہور لانیوالے 2 افراد گرفتار
02 اپریل ، 2023
پاکستان تحریک انصاف کے رہنما علی امین گنڈا پور کے لیے ڈیرہ اسماعیل خان سے اسلحہ لاہور لانے والے دو افراد کو گرفتار کرلیا گیا۔
پولیس کے مطابق بھکرمیں داجل چیک پوسٹ پرچیکنگ کے دوران ایک کار سے 22 رائفلز، میگزین اور گولیاں برآمد کی گئیں۔ پولیس نے بتایا کہ مقدمہ درج کرکے دو افراد کو گرفتار کرلیا گیا ہے۔ ایف آئی آر کے مطابق اسلحہ علی امین گنڈاپورکی سکیورٹی کیلئے تھا۔
ڈی پی اوبھکرمحمد نوید نے جیونیوزکوبتایاکہ گرفتارملزمان نے پولیس کو بتایا اسلحہ نجی سکیورٹی کمپنی کی ملکیت ہے۔
انہوں نے مزید بتایا کہ اسلحہ منتقلی پرپولیس کوفراہم کردہ اجازت نامےکی جانچ کی جارہی ہے، ملزمان نے چیکنگ کے دوران فرارکی کوشش کی اور بیرئیر توڑا، اس معاملے پر مزید تفتیش جاری ہے۔
دوسری جانب جیونیوز نے علی امین سے رابطہ کرنے کی کوشش کی لیکن ان سے رابطہ ممکن نہیں ہوسکا۔
