چیٹ جی پی ٹی پر دنیا میں پہلا ہتک عزت کا مقدمہ کون دائر کر رہا ہے؟

05 اپریل ، 2023

آسٹریلوی میئر کے وکلا نے 21 مارچ کو اوپن اے آئی کو اپنے تحفظات سے متعلق خط لکھ کر اپنی غلطی درست کرنے کیلئے 28 روز کی مہلت دے دی۔فوٹو: سڈنی مارننگ ہیرالڈ

آسٹریلوی شہر ہیپبرن شائر کے میئر نے چیٹ جی پی ٹی کی مالک کمپنی اوپن اے آئی پر دنیا کا پہلا ہتک عزت کا مقدمہ داخل کرنے کی تیاری کر لی۔

ہیپبرن شائر کے میئر برائن ہوڈ کا کہنا ہے کہ انہوں نے چیٹ جی پی ٹی پر اپنے کے بارے میں غلط معلومات پھیلانے کے الزام میں ہتک عزت کا مقدمہ داخل کرنے کی تیاری کرلی ہے، اگر چیٹ جی پی ٹی نے غلط معلومات نہ ہٹائی تو وہ مقدمہ داخل کردیں گے۔

ہیپبرن شائر کے میئر برائن ہوڈ کے وکلا نے 21 مارچ کو اوپن اے آئی کو اپنے تحفظات سے متعلق خط لکھ کر غلطی درست کرنے کیلئے 28 روز کی مہلت دے دی۔

برائن ہوڈ نے بتایا کہ گزشتہ سال نومبر میں کونسل اراکین اور شہریوں کی نشاندہی پر انہیں معلوم ہوا کہ چیٹ چی پی ٹی پر ان کے بارے میں غلط معلومات پھیلائی جا رہی ہے اور انہیں 2000 میں آسٹریلیا کے مرکزی بینک کی نوٹ پبلشنگ برانچ کے غیر ملکی رشوت کے اسکینڈل میں سزا ہو چکی ہے۔

انہوں نے بتایا کہ وہ آسٹریلیا کی مرکزی بینک کے نوٹ چھاپنے والی برانچ سے منسلک تھے لیکن انہوں نے ہی بینک اتھارٹیز کو غیر ملکی حکام کو نوٹ چھاپنے کے کانٹریکٹس کیلئے دی جانے والی رشوت کی نشاندہی کی تھی، ان پر کبھی الزام عائد ہوا تھا اور نہ ہی انہیں سزا ہوئی تھی۔

ماہرین کا خیال ہے کہ میئر برائن ہوڈ اگر مقدمہ داخلہ کردیتے ہیں تو یہ آرٹیفیشل انٹیلی جنس کی اس نئی ایجاد پر کیا جانے والا دنیا کا پہلا مقدمہ ہوگا۔