کے پی نگران کابینہ کا ایک ہی روز قومی و صوبائی اسمبلیوں کے انتخابات کرانے کا مطالبہ

پشاور: خیبرپختونخوا کی نگران کابینہ نے ملک میں ایک ہی روز قومی اور صوبائی اسمبلیوں کے انتخابات کرانے کا مطالبہ کردیا۔

 خیبرپختونخوا کی نگران کابینہ کا موجودہ سیاسی صورتحال پراجلاس ہوا جس کی صدارت نگراں صوبائی وزیرمسعود شاہ نے کی۔

کابینہ اجلاس کے فیصلوں کی تفصیلات بتاتے ہوئے نگران وزیراطلاعات فیروزجمال شاہ نے کہا کہ نگران کابینہ نے پنجاب اسمبلی کے انتخابات مئی میں کرانے کے سپریم کورٹ کے حکم پرشدید تحفظات کا اظہارکیا اور ملک میں قومی و صوبائی اسمبلیوں کے انتخابات ایک ہی روزکرانے کا مطالبہ کیا ہے۔ 

فیروز جمال شاہ نے کہا کہ آئین مقدس دستاویز ہے اور  آئین کی پاسداری ہر ادارے کی ذمہ داری ہے۔

انہو ں نے مزید کہا کہ پنجاب اسمبلی کے انتخابات جلد کرانے سے قومی انتخابات پرپنجاب کے نتائج اثرانداز ہونے کے خدشات ہیں، ملک کی تاریخ میں کبھی قومی و صوبائی انتخابات الگ تاریخوں پر نہیں کروائے گئے۔

نگران وزیراطلاعات کا کہنا تھا کہ صوبے میں اس وقت امن وامان کی صورتحال عام انتخابات کے لیے موزوں نہیں۔