کراچی میں موجودہ عید سیزن بدترین قرار، مجموعی شاپنگ کورونا کے دنوں سے بھی کم رہی

آسمانوں کو چھوتی مہنگائی عید کی خوشیاں بھی کھا گئی، کراچی کے دکان دار تڑپ کر رہ گئے، عید کے موجودہ سیزن کو ملکی تاریخ کا بدترین سیزن قرار دے دیا۔

تاجروں کا کہنا ہے کہ اس عید پر شہر میں صرف 20 ارب روپے کی خریداری ہوئی، یہ خریداری گذشتہ برسوں میں کورونا کی بندش کے دوران کی گئی شاپنگ سے بھی کم ہے، گذشتہ سال بھی 25 سے 30 ارب روپے کی خریداری گئی تھی۔

 تاجروں کا کہنا ہے کہ دکانداروں نے عید کیلئے جو اسٹاک اکٹھا کیا تھا اس کا آدھا بھی بمشکل فروخت کر پائے، شہر کے بازار عید کی روایتی گہما گہمی سے محروم رہے۔

 آل کراچی تاجر اتحاد کے چیئرمین عتیق میر نے کاروباری افراد کیلئے عید کا سیزن مایوس کن قرار دے دیا  اور کہا کہ عید کی 80 فیصد خریداری بچوں اور خواتین کے کم قیمت کپڑوں کی ہوئی۔