ٹرک سے بکریاں چرانے کی ویڈیو بھی بھارت کی نکلی

بھارت میں تالے والی قبر کی موجودگی کے باوجود اسے پاکستانی قبر کہنے کی حقیقت افشا ہونے کے بعد چلتے ٹرک سے بکریاں چرانے کی ویڈیو بھی بھارت کی نکلی جسے بھارتی میڈیا نے بھی تسلیم کرلیا۔

حال ہی میں سوشل میڈیا پر ایک ویڈیو وائرل ہوئی تھی جس میں سڑک پر تیزی سے رواں دواں ٹرک پر چڑھے ایک شخص کو چرانے کی غرض سے بکریاں بے رحمی سے نیچے پھینکتے ہوئے دیکھا گیا تھا۔

ویڈیو میں ٹرک پر چڑھے شخص نے کئی بکریاں سڑک پر پھینکنے کے بعد کار پر چھلانگ لگائی تھی۔

بعد ازاں اس ویڈیو کو سوشل میڈیا پر پاکستان کی ویڈیو کہتے ہوئے شیئر کیا جانے لگا تاہم یہ پروپیگنڈہ بھی زیادہ دیر نہ چل سکا اور زیر غور سڑک پر لگے روڈ سائن کو دیکھتے ہوئے اس ویڈیو کا پول کھل گیا۔

بھارتی میڈیا پر کیے گئے فیکٹ چیک  میں بتایا گیا ہے کہ بکریاں چرانے کی ویڈیو پاکستان کے بجائے بھارت کی ہی ہے ، افسوسناک واقعہ بھارتی ریاست مہاراشتڑا ناشک میں پیش آیا۔