کھیل

9 مئی کے احتجاجی مظاہروں اور توڑ پھوڑ کے واقعات پر شاہد آفریدی نے بالآخر خاموشی توڑ دی

17 مئی ، 2023

پاکستان کرکٹ ٹیم کے سابق کپتان شاہد آفریدی نے 9 مئی کو پی ٹی آئی چیئرمین عمران خان کی گرفتاری کے بعد تحریک انصاف کے کارکنوں کی جانب سے ملک بھر میں کیے گئے احتجاجی مظاہروں اور توڑ پھوڑ کے واقعات پربالآخر خاموشی توڑ دی۔

9 مئی کو پاکستان تحریک انصاف کے چیئرمین عمران خان کی گرفتاری کے بعد پی ٹی آئی کارکنوں نے ملک کے مختلف شہروں میں احتجاج اور جلاؤ گھیراؤ کیا تھا۔

پی ٹی آئی کارکنوں نے جناح ہاؤس لاہور سمیت فوجی تنصیبات، تاریخی عمارتوں، سرکاری املاک اور گاڑیوں کو آگ لگا دی تھی اور پاک فوج نے 9 مئی کو یوم سیاہ قرار دیا۔

شاہد آفریدی اکثر ملکی حالات پر بیانات جاری کرتے رہتے ہیں لیکن عمران خان کی گرفتاری کے بعد ملک میں ہونے والے مظاہروں اور توڑ پھوڑ کے واقعات پر انہوں نے خاموشی قائم رکھی اور کوئی ان کی جانب سے کوئی ردعمل سامنے نہیں آیا۔

تاہم ان واقعات کو کئی دن گزرجانے کے بعد شاہد آفریدی نے احتجاجی مظاہروں پر کوئی بیان جاری نہ کرنے کی وجہ بتائی۔

نجی ٹی وی چینل کو انٹرویو دیتے ہوئے قومی کرکٹ ٹیم کے سابق کپتان شاہد آفریدی نے کہا کہ 'بات یہ ہے کہ ہمارے یہاں مثبت چیز پر بھی کافی تنقید کی جاتی ہے، اختلاف رائے اچھی چیز ہے لیکن گالم گلوچ ، اخلاقیات سے اتر کر بدتمیزی کرنا، ایسی صورتحال میں انسان کہتا ہے کہ میں ان سب چیزوں سے سائیڈ میں ہی ہوجاؤں اور یہی وجہ کے میں نے اس حوالے سے کوئی بات نہیں کی'۔

شاہد آفریدی نے کہا کہ ہر کام ہوسکتا ہے، میری صرف اتنی درخواست ہے کہ ملک کے تمام ادارے اپنے دائرہ اختیار میں رہ کر کام کریں، بہت سے چیزیں کافی آسان ہوجائیں گی۔