18 مئی ، 2023 
ویڈیو: شیریں مزاری کی دوبارہ گرفتاری، بیٹی پھوٹ پھوٹ کر روپڑیں
18 مئی ، 2023
پی ٹی آئی رہنما شیریں مزاری کی دوبارہ گرفتاری کے موقع پر ان کی بیٹی ایمان مزاری پھوٹ پھوٹ کر روپڑیں۔
گزشتہ روز پنجاب پولیس کی خواتین اہلکاروں نے شیریں مزاری کو گرفتار کیا تھا، سوشل میڈیا پر شیریں مزاری کی گرفتاری کے وقت کی ویڈیو سامنے آئی ہے جس میں پولیس اہلکار انہیں گاڑی میں بٹھاکر لے جاتے دیکھے جاسکتے ہیں، اسی دوران ایمان والدہ کی ہمت بڑھاتے ہوئے انہیں واضح کررہی ہیں کہ وہ انہیں باہر نکال لیں گی۔
گرفتاری کے بعد ایمان مزاری کو پھوٹ پھوٹ کر روتے ہوئے بھی دیکھا گیا جس دوران ان کے گھر میں موجود خواتین انہیں چپ کرواتی رہیں۔
شیریں مزاری کی گرفتاری کے بعد سوشل میڈیا پر ان کی حمایت میں جہاں متعدد ٹوئٹس سامنے آئیں وہیں ان کی مخالفت میں بھی کئی پوسٹ سامنے آئی ہیں۔
رضا دھاریجو پی پی پی نامی سوشل میڈیا صارف نے شیریں مزاری کی گرفتاری پر تبصرہ کرتے ہوئے لکھا کہ جو بویا وہ کاٹنا تو پڑے گا۔
ایمان مزاری نے ٹوئٹ پر ردعمل دیتے ہوئے صارف سے سوال کیا کہ میری ماں نے کیا بویا ہے؟ وہ باہر بھی نہیں نکلیں، میری ماں نے کوئی جرم نہیں کیا جو انہیں ایک کے بعد دوسرے کیس میں اٹھایا جارہا ہے۔
