Time 10 جون ، 2023
انٹرٹینمنٹ

طلاق کے بعد فلم اور ایک ساتھ پروموشن کرنے پر تنقید، سائرہ اور شہروز نے کیا کہا؟

سائرہ اور شہروز کی 2012 میں لو میرج ہوئی تھی، تاہم 2020 میں ان کے درمیان طلاق ہوگئی تھی__فوٹو: اسکرین گریب
سائرہ اور شہروز کی 2012 میں لو میرج ہوئی تھی، تاہم 2020 میں ان کے درمیان طلاق ہوگئی تھی__فوٹو: اسکرین گریب

پاکستان شوبز انڈسٹری کی طلاق یافتہ جوڑی شہروز سبزواری اور سائرہ یوسف نے طلاق کے بعد فلم کرنے اور پھر ایک ساتھ فلم کی تشہیر اور انٹرویوز دینے پر خیالات کا اظہار کیا ہے۔

ان دنوں سائرہ اور ان کے سابق شوہر  شہروز  آنے والی رومانوی کامیڈی فلم ’بے بی لیشس‘ کی پروموشن میں مصروف ہیں تاہم طلاق کے باوجود اس طرح ایک ساتھ انٹرویوز دینے اور ملاقاتوں پر سوشل میڈیا پر اداکاروں کو تنقید کا سامنا ہے۔

حال ہی میں ایک انٹرویو کے دوران سائرہ یوسف اور شہروز سبزواری سے میزبان نے سوال کیا کہ آپ لوگ اب حقیقی زندگی میں میاں بیوی نہیں رہے تو کیا ایک ساتھ فلم کی پروموشن میں مشکل پیش آئی؟

جواب میں شہروز سبزواری نے انکار کیا اور کہا نہیں ہمیں کوئی مشکل پیش نہیں آئی۔

اداکار کے مختصر جواب کے فوری بعد سائرہ یوسف نے کہا کہ ’میرے خیال میں ہمیں زیادہ مشکل اس لیے پیش نہیں آئی کیونکہ ہم دونوں ایک بچی کے والدین بھی ہیں، اس لیےہمارا ایک دوسرے کے ساتھ اچھا تعلق ہے'۔

اداکارہ کا مزید کہنا تھا کہ ہم اپنی بیٹی کے لیےایک دوسرے کے ساتھ مثبت سوچ اور سمجھ کا تعلق قائم کرنا چاہتے ہیں کیونکہ جیسا ہم دونوں کا آپس میں تعلق ہوگا ہماری بیٹی ویسا ہی محسوس کرے گی، اسی لیے ایک ساتھ فلم کی پروموشن میں ہمیں مشکل پیش نہیں آتی۔

سائرہ یوسف کا کہنا تھا کہ بیٹی سے متعلق کوئی بھی فیصلہ کرنے سے پہلے ہم دونوں آپس میں خیالات کا تبادلہ کرتے ہیں۔

اداکارہ نے مزید بتایا کہ چونکہ بیٹی کے لیے ہمارا آپس میں تعلق اچھا ہے اس لیے ہم ایک ساتھ فلم کی پروموشن کرسکتے ہیں، اگر ہمارا تعلق ایسا نہیں ہوتا تو ہم فلم کی پروموشن نہیں کررہے ہوتے۔

واضح رہے کہ سائرہ اور شہروز کی 2012 میں لو میرج ہوئی تھی تاہم 2020 میں ان کے درمیان طلاق ہوگئی تھی جس کے بعد شہروز نے اداکارہ و ماڈل صدف کنول سے شادی کرلی، ان کی ایک بیٹی زہرا بھی ہے۔

شہروز اور سائرہ یوسف کی بھی ایک بیٹی ہے جس کا نام نوریح ہے۔

مزید خبریں :