16 جون ، 2023 
سری لنکا سے ٹیسٹ سیریز کیلئے پاکستانی ٹیم میں نئے چہروں کی شمولیت کا امکان
16 جون ، 2023
سری لنکا کے خلاف ٹیسٹ سیریز کے لیے پاکستان کرکٹ ٹیم میں نئے چہروں کی شمولیت کا امکان ہے۔
پاکستان اور سری لنکا کے درمیان دو ٹیسٹ میچوں کی سیریز 16 سے 28 جولائی 2023 تک ہونے کا امکان ہے۔
ذرائع کے مطابق سری لنکا کے خلاف دو ٹیسٹ میچوں کی سیریز کے لیے قومی ٹیم میں عمیر بن یوسف، محمد حریرہ اور عامر جمال کو شامل کیے جانے کا امکان ہے۔
ذرائع پاکستان کرکٹ بورڈ کا بتانا ہے کہ پی سی بی سلیکشن کمیٹی نے کھلاڑیوں کی فہرست کو حتمی شکل دے دی ہے، سری لنکا سے سیریز کے لیے قومی اسکواڈ کا اعلان کل کر دیا جائے گا۔
ذرائع کے مطابق ٹیسٹ سیریز کے لیے قومی ٹیم میں وکٹ کیپر سرفراز احمد اور فاسٹ بولر حسن علی کی جگہ برقرار رہے گی تاہم میر حمزہ اور زاہد محمود کا ٹیم میں جگہ برقرار رکھنا مشکل ہے۔
ذرائع کا کہنا ہے کہ فاسٹ بولر وسیم جونیئر بھی سری لنکا کے خلاف سیریز کے لیے قومی اسکواڈ کا حصہ نہیں ہوں گے۔
ذرائع کا بتانا ہے کہ فخر زمان کو فی الحال ریڈ بال کرکٹ میں واپسی پر سلیکٹرز میں اتفاق نہیں ہوا ہے تاہم شاہین آفریدی کی ریڈ بال ٹیم میں واپسی کا امکان ہے۔
ذرائع کے مطابق دورہ سری لنکا کی تیاریوں کے لیے قومی کرکٹرز کا کیمپ کراچی میں لگایا جائے گا، قومی کرکٹرز 3 سے 9 جولائی کے درمیان کراچی میں کیمپ کے بعد سری لنکا روانہ ہوجائیں گے۔
