26 جون ، 2023 
کراچی: بینظیر انکم سپورٹ پروگرام کے مرکز میں بھگدڑ، 16 خواتین زخمی اور بیہوش
26 جون ، 2023
کراچی کے علاقے کیماڑی میں واقع کے پی ٹی گراؤنڈ میں بینظیر انکم سپورٹ پروگرام کے مرکز میں بھگدڑ مچ گئی جس کے نتیجے میں وہاں موجود 16 خواتین زخمی اور بیہوش ہوگئیں۔
زخمی خواتین کو ریسکیو کرنے کے لیے متعدد ایمبولینس روانہ کی گئیں جن کے ذریعے زخمی خواتین کو اسپتال منتقل کیا گیا۔
ریسکیو ذرائع کے مطابق ایک زخمی خاتون کی حالت تشویش ناک ہے۔
دوسری جانب علاقہ پولیس کے مطابق کے پی ٹی اسکول میں بینظیر انکم سپورٹ پروگرام کا کیمپ لگا تھا، جس کے باہر خواتین اور بچوں کی بڑی تعداد موجود تھی۔
پولیس نے بتایا ہے کہ اسکول کا گیٹ کھلا تو اندر جانے کے لیے بھگدڑ مچ گئی۔
ایک متاثرہ خاتون نے بتایا ہے کہ بینظیر انکم سپورٹ پروگرام کے تحت ہمیں پیسے دینے بلایا گیا تھا۔
دوسری جانب ایس پی بلدیہ مغیز ہاشمی کا کہنا ہے کہ سول اسپتال میں 20 خواتین پہنچی ہیں، 16 خواتین زخمی اور بیہوش ہوئی تھیں، دیگر چار خواتین زخمی خواتین کے ہمراہ طبی امداد کے لیے اسپتال گئی تھیں۔
ایس پی بلدیہ کے مطابق اسکول میں جگہ کم ہونے سے وقفےوقفے سےلوگوں کو بھیجاجارہا تھا،گیٹ کھلا تو بھگڈر مچ گئی،گیٹ پر لوگوں کی تعداد بہت زیادہ تھی،گیٹ کھلنے پراسکول کی ڈھلان تھی،جس سے خواتین گر گئیں، متعدد خواتین گرمی کی وجہ سے بیہوش ہوئیں۔
