آئی فون کے بیک پر موجود ایپل لوگو کو بٹن کے طور پر استعمال کرنے کا طریقہ جانتے ہیں؟

30 جون ، 2023

اس کا استعمال کرنے کے لیے بٹن کو ان ایبل کرنا ضروری ہے / فائل فوٹو

اگر آپ کے اسمارٹ فون کے بیک پر ایک سیب کا لوگو (logo) موجود ہے تو اس کا مطلب ہے کہ آپ آئی فون استعمال کر رہے ہیں۔

درحقیقت دنیا بھر میں کروڑوں افراد ایپل کے آئی فون کے مختلف ماڈلز استعمال کرتے ہیں۔

مگر بہت کم افراد کو معلوم ہے کہ آئی فون کا لوگو درحقیقت ایک بٹن کا کام بھی کر سکتا ہے۔

جی ہاں واقعی ایپل لوگو واقعی آئی فون کا ایسا خفیہ بٹن ہے جس کا علم بہت کم افراد کو ہوتا ہے۔

ویسے یہ کوئی حقیقی نہیں بلکہ ورچوئل بٹن ہے مگر یہ بہت کارآمد ثابت ہو سکتا ہے۔

آئی فونز کے اس فیچر کو بیک ٹیپ (back tap) کہا جاتا ہے اور اس کا استعمال آئی او ایس 14 یا اس سے بعد کے آپریٹنگ سسٹمز پر کام کرنے والے آئی فون ماڈلز پر ممکن ہے۔

مگر بیشتر افراد کو اس فیچر کا علم کیوں نہیں؟ اس کی وجہ یہ ہے کہ ایپل لوگو کو بٹن کے طور پر استعمال کرنے کے لیے اسے ان ایبل کرنا ہوتا ہے۔

تو یہ فیچر کیسے استعمال کریں؟

اس مقصد کے لیے آئی فون سیٹنگز میں جائیں اور وہاں Accessibility پر کلک کریں۔

Accessibility میں ٹچ مینیو میں جاکر نیچے اسکرول کریں (وہاں سب سے آخر میں) اور بیک ٹیپ آپشن پر کلک کریں۔

وہاں آپ کے سامنے ڈبل ٹیپ یا ٹرپل ٹیپ آپشنز آئیں گے جن میں سے کسی ایک کا انتخاب کریں۔

اس بٹن کو آپ مختلف کاموں میں سے کسی ایک کے لیے مختص کر سکتے ہیں جیسے ایپ سوئچر، کنٹرول سینٹر، ہوم، لاک اسکرین، میوٹ، نوٹیفکیشن سینٹر، اسکرین شاٹ، اسپاٹ لائٹ، والیوم ڈاؤن، والیوم اپ، کیمرا اور دیگر۔

آپ ورچوئل بٹن کے لیے کسی ایک چیز کو متحرک کر سکیں گے، اب وہ کیمرا ہو یا کچھ اور، اس کا فیصلہ آپ کو خود کرنا ہوگا۔