کاروبار

نئے فنانس ایکٹ پر عمل درآمد شروع، اضافی سپر ٹیکس نئی شرح سے نافذ ہو گیا

02 جولائی ، 2023

فیڈرل بورڈ آف ریونیو (ایف بی آر) کی جانب سے نیا فنانس ایکٹ 2023 آفیشل ویب سائٹ پر جاری کردیا گیا— فوٹو: فائل

نئے فنانس ایکٹ 2023 پر عمل درآمد شروع ہو گیا، زیادہ آمدن پر اضافی سپر ٹیکس نئی شرح سے نافذ ہو گیا، فیڈرل بورڈ آف ریونیو (ایف بی آر) کی جانب سے ایکٹ آفیشل ویب سائٹ پر جاری کردیا گیا۔

سپر ٹیکس کیلئے انکم سلیب 30 کروڑ سے بڑھا کر50 کروڑ کر دی گئی جبکہ سالانہ 50 کروڑ روپے سے زیادہ آمدن پر 10 فیصد سپر ٹیکس نافذ ہوگیا۔

نئے فنانس ایکٹ کے تحت بینکنگ کمپنیوں کی 30 کروڑ سے زیادہ آمدن پر بھی 10 فیصد سپر ٹیکس عائد ہوگا۔

40 سے 50 کروڑ کمانے والی کمپنیوں کو 8 فیصد سپر ٹیکس دینا ہوگا جبکہ 35 کروڑ سے 40 کروڑ آمدن پر سپر ٹیکس شرح 4 سے بڑھا کر 6 فیصد کردی گئی ہے۔

سالانہ 30 کروڑ سے 35 کروڑ روپے آمدن پر 4 فیصد سپر ٹیکس شرح برقرار، 25 کروڑ سے 30 کروڑ آمدن پر 3 فیصد سپر ٹیکس شرح لاگو رہے گی۔

نئے فنانس ایکٹ کے تحت سالانہ 20 کروڑ سے 25 کروڑ روپے آمدن پر 2 فیصد سپر ٹیکس ادا کرنا ہوگا، 15 کروڑ سے 20 کروڑ روپے آمدن پر 1 فیصد سپر ٹیکس برقرار ہے جبکہ سالانہ 15 کروڑ روپے تک آمدن پر سپر ٹیکس کی شرح صفر سطح پر برقرار۔

نئے فنانس ایکٹ میں ایئر لائنز، آٹو موبائلز، بیوریجز، سیمنٹ، کیمکلز، سگریٹ، تمباکو سیکٹر، فرٹیلائزر، لوہا، اسٹیل، ایل این جی ٹرمینل اور آئل مارکیٹنگ سمیت آئل ریفائنری کے شعبے بھی سپر ٹیکس کی کیٹیگری میں شامل ہیں جبکہ پیٹرولیم، گیس، ادویہ سازی، شوگر، ٹیکسٹائل پر بھی 10 فیصد سپر ٹیکس نافذ ہوگا۔