07 جولائی ، 2023 
کراچی سمیت سندھ بھر میں آج سے بادل برسنے کی پیشگوئی
07 جولائی ، 2023
محکمہ موسمیات نے کراچی سمیت سندھ بھر میں آج سے 9 جولائی تک بارش کی پیشگوئی کی ہے۔
محکمہ موسمیات کی جانب سے کراچی شہر اور مضافات میں آندھی اور گرج چمک کے ساتھ بارش کا امکان ظاہر کیا گیا ہے۔
محکمہ موسمیات نے حیدرآباد، دادو ،جامشورو، قمبر، تھرپارکر، عمرکوٹ، لاڑکانہ، جیکب آباد ،کشمور، ٹھٹہ، سجاول اوربدین میں بھی کہیں کہیں آندھی اور گرج چمک کیساتھ بارش کی پیشگوئی کی ہے۔
اس حوالے سے میئر کراچی مرتضیٰ وہاب نے شہر بھر میں رین ایمرجنسی نافذ کرنے کے احکامات جاری کردیے۔
میئر کراچی نے کہا کہ کے ایم سی کے تمام متعلقہ محکمے 24 گھنٹے کھلے رہیں گے اوربارشوں میں عملہ مشینری کے ساتھ موجود رہے گا۔
اس کے علاوہ میئر کراچی مرتضیٰ وہاب نے شہر کے مختلف علاقوں میں طارق روڈ، عمر شریف، شہید ملت، شہید منور سہروری سمیت دیگر انڈر پاسز کا دورہ کیا اوربارشوں سے قبل انڈر پاسز میں صفائی ستھرائی کی صورتحال کو یقینی بنانے کے احکامات جاری کیے۔
انہوں نے کہا کہ کوشش کی جائے کہ بارشوں کے دوران انڈر پاسز میں پانی رکنے نہ پائے۔
