نیمل کی سرجری: عثمان مختار اداکارہ کی حمایت میں بول پڑے

پاکستانی اداکار عثمان مختار نے ساتھی اداکارہ نیمل خاور خان کی مبینہ کاسمیٹک سرجری پر کہا کہ یہ ان کا ذاتی فیصلہ تھا جس سے کسی دوسرے شخص کو کوئی نقصان نہیں پہنچا ہے۔

گزشتہ ماہ نیمل خاور خان کی کچھ تصاویر سوشل میڈیا پر وائرل ہوئی تھیں جس پر مداحوں نے الزام عائد کیا تھا کہ اداکارہ نے اپنی ناک کی سرجری کروائی ہے، کچھ لوگوں کا یہ بھی کہنا تھا کہ یہ سرجری نیمل نے حمزہ کی بہن اور اپنی نند فضیلہ عباسی سے کروائی ہے۔

بعدازاں ڈاکٹر فضیلہ عباسی نے اس افواہ کی تردید کرتے ہوئے کہا تھا کہ انہوں نے نیمل کی سرجری نہیں کی۔

تاہم سوشل میڈیا پر ٹرینڈ کرنے اور تنقید کا نشانہ بنے رہنے کے باوجود اداکارہ کی جانب سے کوئی بیان جاری نہیں کیا گیا جہاں صارفین نے نیمل پر تنقید کی وہیں کئی اداکاراؤں نے نیمل خاور کی حمایت کی۔

فضیلہ عباسی پر نیمل خاور کی سرجری کرنے کا الزام، اداکارہ کی نند نے بیان جاری کردیا

ٹوئٹر پر متعدد صارفین نے حمزہ علی عباسی کی بہن ڈرماٹولوجسٹ فضیلہ عباسی کو نشانہ بنایا

اب ان کے دوست اور مقبول ڈرامے انا میں ان کے ساتھ کام کرنے والے عثمان مختار نے اس حوالے سے خیالات کا اظہار کیا ہے۔

عثمان مختار نے کہا کہ 'ہم پورا پورا دن سوشل میڈیا پر بیٹھ کر ذہنی صحت کی بات کرتے ہیں کہ یہ کتنی ضروری ہے، پھر اس کے بعد ایک انسان جس نے خود سے متعلق فیصلہ کیا، جو انہوں نے کیا وہ ان کا انتخاب ہے جس سے کسی کو نقصان نہیں پہنچا'۔

اداکار نے کہا 'ہر کسی میں اتنی عقل ہوتی ہے کہ کسی نے کچھ کیا اور آپ کو پسند نہیں تو آپ وہ نہیں کریں گے لیکن ہم بیٹھ کر پورا دن ان کو ٹرول کررہے ہیں تو جو ذہنی صحت کا بھاشن ہم دیتے ہیں، اس کا کیا فائدہ ہے؟ اس کا احساس ہم سب کو ہونا چاہیے کہ ہمیں اس قسم کی چیزیں نہیں کرنا چاہئیں'۔