31 جولائی ، 2023 
کراچی کی آبادی 3 کروڑ سے زیادہ ہے اس سے کم کوئی نمبرقابلِ قبول نہیں، ایم کیو ایم
31 جولائی ، 2023
متحدہ قومی موومنٹ (ایم کیو ایم) پاکستان کے کنوینر خالد مقبول صدیقی نے خبردار کیا ہے کہ کراچی کی آبادی 3 کروڑ سے زیادہ ہے اس سے کم کوئی نمبرقابلِ قبول نہیں۔
کراچی میں پریس کانفرنس کرتے ہوئے خالد مقبول صدیقی کا کہنا تھاکہ گزشتہ پانچ دہائیوں سے مردم شماری کے معاملے پر سندھ کے شہری علاقوں پر شب خون مارا گیا، اس بار بھی کراچی کی آبادی دو کروڑ ظاہر کرنے کی سازش کی جارہی ہے لیکن ہم تین کروڑ سے کم کسی نمبر کو تسلیم نہیں کریں گے۔
انہوں نے کہا کہ عام انتخابات میں تاخیر نہیں چاہتے، ہمارا مطالبہ ہے کہ انتخابات فوری اور شفاف ہوں، اس کیلئے درست مردم شماری ہو پھر اس پر نئی حلقہ بندیاں اور ووٹر فہرستیں بنیں۔
ان کا کہنا تھاکہ ہم انتخابات کیلئے تیار ہیں، پہلا مطالبہ شفاف مردم شماری اور دوسرا مطالبہ شفاف مردم شماری کی بنیاد پر فوری انتخابات ہیں۔
سینیئر ڈپٹی کنوینر ڈاکٹر فاروق ستار کا کہنا تھا کہ ایم کیو ایم کراچی کی ایک کڑور 91 لاکھ کی آبادی کا نمبر مسترد کرتی ہے، امید ہے کہ وفاقی حکومت اس بار درست مردم شماری کے ذریعے کراچی کے زخموں پر مرہم رکھیں گی۔
