02 اگست ، 2023 
'بورڈ میں تبدیلی کا فیصلہ نجم سیٹھی کو ہضم نہیں ہورہا'، سرفراز نواز کا وزیراعظم کو خط
02 اگست ، 2023
سابق ٹیسٹ کرکٹر سرفراز نواز نے وزیراعظم شہباز شریف کو خط لکھ کر کرکٹ بورڈ میں معاملات خراب ہونے کا ذکر کیا ہے۔
سرفراز نواز نے اپنے خط میں کہا کہ پی سی بی سے جانے والے نجم سیٹھی اب بھی کرکٹ بورڈ کے معاملات میں رکاوٹ بن رہے ہیں، یہ بات بین الاقوامی سطح پر بھی مشاہدے میں آئی ہے کہ اندرونی سیاست ہو رہی ہے۔
سابق ٹیسٹ کرکٹر نے کہا کہ بورڈ میں تبدیلی کا فیصلہ وزیراعظم اور کابینہ نے مشترکہ طور پر کیا جو سابق عہدیداران نجم سیٹھی اور شکیل شیخ کو ہضم نہیں ہو رہا۔
سرفراز نواز کا کہنا ہے کہ موجودہ پی سی بی مینجمنٹ کے لیے مشکلات پیدا کی جا رہی ہیں، مینجمنٹ کمیٹی کے چیئرمین ذکا اشرف کو آپ کی سپورٹ کی ضرورت ہے۔
انہوں نے خط میں یہ بھی کہا کہ پیٹرن آپ کے معاملات دیکھنے سے ایشیا کپ اور ورلڈکپ جیسے میگا ایونٹس کے معاملات اچھے انداز میں ہوں گے۔
سرفراز نواز نے کہا کہ جونیئر ورلڈ اسکواش چیمپئن کے لیے کیش ایوارڈ کا اعلان قابل ستائش ہے۔
